نئی دہلی، 16 اکتوبر (ہ س)۔ دہلی پولیس نے شمال مشرقی دہلی کے نیو سیلم پور میں الیکٹرانک سامان کی مرمت کی دکان پر 32 سالہ وسیم کو گولی مار کر قتل کرنے کے معاملے میں الطمش خان (30) کو گرفتار کیا ہے۔ ملزم کے قبضے سے وہ کپڑے برآمد کیے گئے ہیں جو اس نے مبینہ طور پر واردات کے وقت پہن رکھے تھے۔ اس معاملے میں دیگر افراد کی شناخت کرکے انہیں گرفتار کرنے کی کوششیں جاری ہیں۔

پولیس کے مطابق، 14 اکتوبر کی رات تقریباً 9 بج کر 4 منٹ پر جگ پرویش چندر (جے پی سی) اسپتال سے سیلم پور تھانے کو اطلاع ملی کہ گولی لگنے سے زخمی ایک شخص کو اسپتال لایا گیا ہے۔ ڈاکٹروں نے معائنے کے بعد اسے مردہ قرار دے دیا۔ مقتول کی شناخت نیو سیلم پور کے ای بلاک کی جھگی میں رہنے والے وسیم (32) کے طور پر ہوئی۔ اسے گلی نمبر 9 میں نالے کے قریب واقع الیکٹرانک سامان کی مرمت کی دکان پر گولی ماری گئی تھی۔ اس کے بعد مقامی لوگوں نے اسے اسپتال پہنچایا تھا۔

واقعے کی اطلاع ملنے کے بعد فارینسک ٹیم نے جائے وقوعہ کا معائنہ کرکے شواہد جمع کیے۔ اس معاملے میں 15 اکتوبر کو سیلم پور تھانے میں قتل اور آرمس ایکٹ کی متعلقہ دفعات کے تحت ایف آئی آر درج کی گئی۔ اس کے بعد تھانہ انچارج انسپکٹر ابھیجیت کی قیادت میں پولیس ٹیم نے جائے وقوعہ اور آس پاس کے علاقوں میں نصب سی سی ٹی وی کیمروں کی فوٹیج کی جانچ کی۔ اس کے ساتھ ہی مختلف ذرائع سے معلومات جمع کرکے تکنیکی تفتیش بھی کی گئی۔

مسلسل کوششوں کے بعد پولیس نے ملزم الطمش خان کی شناخت کرکے اسے گرفتار کر لیا۔ وہ نیو سیلم پور کے کے بلاک کا رہائشی ہے۔ اس کے قبضے سے وہ کپڑے بھی برآمد کیے گئے ہیں جو اس نے مبینہ طور پر واردات کے وقت پہنے تھے۔

پوچھ گچھ کے دوران گرفتار ملزم نے اپنے ساتھیوں کے بارے میں معلومات فراہم کی ہیں۔ اس معاملے میں دیگر افراد کے ملوث ہونے کے حوالے سے اہم سراغ ملے ہیں۔ پولیس ان کی شناخت اور گرفتاری کے لیے کوششیں کر رہی ہے۔ گرفتار ملزم کے خلاف پہلے سے لوٹ مار کا ایک مقدمہ بھی درج ہے۔ پولیس قتل کی وجہ اور واردات میں شامل دیگر افراد کے کردار کی جانچ کر رہی ہے۔

ہندوستھان سماچار

ہندوستان سماچار / محمد شہزاد