سیوان، 14 اکتوبر(ہ س)۔ ہندوستان کے پہلے صدرِ جمہوریہ، بھارت رتن ڈاکٹر راجندر پرساد کا اپنی جنم بھومی، اپنی مٹی اور ہندوستانی تہذیب و ثقافت سے گہرا لگاؤ تھا۔ ملک کے اعلیٰ ترین آئینی عہدے پر فائز ہونے کے باوجود انہوں نے اپنی جڑوں اور مذہبی روایات کو فراموش نہیں کیا۔ اس کی ایک زندہ مثال بہار کے ضلع سیوان کے جیرا دیئی گاؤں میں آج بھی دیکھنے کو ملتی ہے، جہاں ڈاکٹر راجندر پرساد کی جانب سے 1953 میں شروع کرائی گئی درگا پوجا کی روایت آج بھی عقیدت و احترام کے ساتھ جاری ہے۔

وقت گزرتا رہا، نسلیں بدلتی رہیں، لیکن ماں درگا کی پوجا سے وابستہ یہ روایت آج بھی گاؤں کی مذہبی عقیدت اور تاریخی ورثے کو محفوظ رکھے ہوئے ہے۔ مقامی باشندوں کے مطابق ڈاکٹر راجندر پرساد نے 1953 میں اپنے آبائی مکان کے قریب ماں درگا کی مورتی نصب کرا کے درگا پوجا کی شروعات کرائی تھی۔ ان کی یہی پہل آج جیرا دیئی کی ایک نمایاں شناخت بن چکی ہے۔

اس روایت کی خاص بات یہ ہے کہ جس مقام پر ڈاکٹر راجندر پرساد نے ماں درگا کی مورتی نصب کرا کر پوجا کا آغاز کیا تھا، آج بھی وہیں مورتی نصب کی جاتی ہے۔ پوجا کمیٹی اور گاؤں کے لوگ مل کر پورے جوش و خروش کے ساتھ اس مذہبی تقریب کی تیاریاں کرتے ہیں۔

پوجا کمیٹی کے صدر دھرمیندر پرساد اور سچن چھوٹن ساہ نے بتایا کہ راجندر بابو نے جس مقام پر ماں درگا کی مورتی نصب کرائی تھی، اسی جگہ آج بھی مورتی قائم کرکے ان کی شروع کی ہوئی روایت کو برقرار رکھا جا رہا ہے۔

نوراتری کے موقع پر جیرا دیئی میں عقیدت و احترام کا ماحول چھا جاتا ہے۔ ماں درگا کی پوجا کے ساتھ گاؤں کے لوگ ملک کے پہلے صدرِ جمہوریہ ڈاکٹر راجندر پرساد کی یادوں کو بھی خراجِ عقیدت پیش کرتے ہیں۔

یہ مذہبی تقریب گاؤں کے لوگوں کو اپنے شاندار تاریخی ورثے سے جڑنے کا موقع فراہم کرتی ہے۔ ساتھ ہی نئی نسل کو بھی یہ جاننے کا موقع ملتا ہے کہ ملک کے پہلے صدرِ جمہوریہ کا اپنی جنم بھومی اور ہندوستانی روایات سے کتنا گہرا تعلق تھا۔

ڈاکٹر راجندر پرساد کی زندگی سادگی، اعلیٰ اقدار اور ہندوستانی روایات کے احترام کی علامت رہی ہے۔ جیرا دیئی میں آج بھی جاری درگا پوجا کی روایت ان کی شخصیت اور نظریات کی یاد تازہ کرتی ہے۔

یہ روایت اس بات کی عکاسی کرتی ہے کہ کسی عظیم شخصیت کی شناخت صرف اس کے عہدے اور کامیابیوں سے نہیں، بلکہ اپنی مٹی، ثقافت اور سماجی روایات سے اس کی وابستگی سے بھی ہوتی ہے۔ جیرا دیئی کے باشندے ماں درگا کی پوجا کے ساتھ ساتھ ملک کے پہلے صدرِ جمہوریہ کے تاریخی ورثے کو بھی نسل در نسل آگے بڑھا رہے ہیں۔

ہندوستھان سماچار

ہندوستان سماچار / Mohammad Afzal Hassan