ابوظہبی، 11 اکتوبر (ہ س):۔

بنگلہ دیش کے تیز گیند باز حسن محمود نے اتوار کو ایک اور اہم کامیابی اپنے نام کرلی۔ وہ ٹیسٹ کرکٹ میں ہیٹ ٹرک کرنے والے بنگلہ دیش کے پہلے فاسٹ بولر بن گئے ہیں۔ انہوں نے افغانستان کے خلاف ابوظہبی میں کھیلے جا رہے واحد ٹیسٹ میچ کے تیسرے دن اتوار کو مسلسل تین گیندوں پر عصمت عالم، قیس احمد اور ضیاء الرحمٰن کو آو¿ٹ کرکے اپنی ہیٹ ٹرک مکمل کی۔

حسن محمود نے عصمت عالم کو بولڈ کرکے ہیٹ ٹرک کا آغاز کیا۔ اس کے بعد اگلی گیند پر قیس احمد نے بلے سے گیند کو کھیلنے کی کوشش کی، لیکن وکٹ کیپر لٹن داس نے ان کا کیچ پکڑ لیا۔ قیس احمد بغیر کوئی رن بنائے پویلین لوٹ گئے۔

مسلسل تیسری گیند پر محمود نے ضیاء الرحمٰن کے خلاف ایل بی ڈبلیو کی اپیل کی۔ میدان میں موجود امپائر نے ابتدا میں ان کی اپیل مسترد کر دی، جس کے بعد بنگلہ دیش نے فیصلہ جائزہ نظام (ڈی آر ایس) کا سہارا لیا۔ ہاک آئی ٹیکنالوجی سے معلوم ہوا کہ گیند آف اسٹمپ سے ٹکرا رہی تھی۔ اس کے بعد امپائر نے اپنا فیصلہ بدلتے ہوئے ضیاء الرحمٰن کو آو¿ٹ قرار دے دیا۔ وہ بھی بغیر کوئی رن بنائے پویلین لوٹ گئے۔

حسن محمود سے پہلے بنگلہ دیش کی جانب سے علوک کپالی نے 2003 میں پشاور میں پاکستان کے خلاف اور سوہاگ غازی نے 2013 میں چٹاگانگ میں نیوزی لینڈ کے خلاف ٹیسٹ کرکٹ میں ہیٹ ٹرک کی تھی۔ یہ دونوں اسپن بولر تھے۔

حسن محمود اب اس فہرست میں شامل ہونے والے بنگلہ دیش کے تیسرے بولر ہیں۔ وہ ٹیسٹ کرکٹ میں ہیٹ ٹرک کرنے والے ملک کے پہلے فاسٹ بولر بھی بن گئے ہیں۔

محمود نے 55 رن دے کر مجموعی طور پر پانچ وکٹیں حاصل کیں۔ ان کی شاندار گیند بازی کے سامنے افغانستان کی پہلی اننگز 240 رن پر سمٹ گئی۔ بنگلہ دیش نے اپنی پہلی اننگز میں 346 رن بنائے تھے۔

ہندوستھان سماچار

ہندوستان سماچار / عطاءاللہ