بیڑ ضلع کے امبہ جوگائی کونسل میں دو میاں - بیوی جوڑیاں، منتخب اور نامزد ارکان کا منفرد امتزاج

امبہ جوگائی (بیڑ)، 19 جنوری (ہ س)۔ بیڑ ضلع کے تعلقے امبہ جوگائی میونسپل کونسل کے حالیہ انتخابی عمل کے بعد جو تصویر سامنے آئی ہے، وہ عام سیاسی منظرنامے سے خاصی مختلف ہے۔ کونسل کے ایوان میں اب دو ایسی جوڑیاں شامل ہو گئی ہیں جن میں میاں اور بیوی دونوں عوامی نمائندے کی حیثیت سے شہر کی خدمت انجام دیں گے، جسے جمہوری سیاست کا ایک نادر اتفاق قرار دیا جا رہا ہے۔

لوک وکاس مہا اگھاڑی کی جانب سے وارڈ 9 میں میدان میں اتری دیپا تائی لومٹے نے کامیابی حاصل کر کے پہلی بار کونسلر بننے کا اعزاز حاصل کیا۔ ان کے ساتھ ہی ان کے شوہر ببن راؤ لومٹے، جو سیاست میں ایک معروف اور تجربہ کار نام ہیں، نامزد کونسلر کے طور پر میونسپل کونسل کا حصہ بن گئے ہیں۔ ببن راؤ لومٹے نے وارڈ 8 سے انتخاب لڑا تھا، لیکن انہیں قلیل ووٹوں کے فرق سے شکست ہوئی۔ اس کے باوجود ان کا سیاسی سفر خاصا طویل رہا ہے، کیونکہ وہ اس سے پہلے تین مرتبہ کونسلر منتخب ہو چکے ہیں اور نائب صدرِ بلدیہ کی ذمہ داری بھی نبھا چکے ہیں۔

دوسری جانب شہر پریورتن جن وکاس اگھاڑی کی نمائندہ شلپا گمبھیرے نے وارڈ 8 سے دوسری بار کامیابی حاصل کی ہے۔ ان کے شوہر سنجے گمبھیرے کو بھی نامزد کونسلر مقرر کیا گیا ہے، جنہوں نے انتخابی مہم کے دوران اتحاد کی کامیابی میں کلیدی کردار ادا کیا تھا۔ ایک ہی کونسل میں دو شوہر- بیوی جوڑیوں کا عوامی نمائندوں کی حیثیت سے شامل ہونا امبہ جوگائی کی سیاسی تاریخ میں ایک منفرد واقعہ سمجھا جا رہا ہے، جو جمہوریت میں عوامی شمولیت کے ایک خاص اور کم نظر آنے والے پہلو کو اجاگر کرتا ہے۔

ہندوستھان سماچار

--------------------

ہندوستان سماچار / جاوید این اے