اے ایم یو میں تاریخی نقشوں اور مخطوطات کی بحالی پر مبنی ہنر فروغ پروگرام 19جنوری سے
علی گڑھ, 17 جنوری (ہ س)۔ علی گڑھ مسلم یونیورسٹی کا ہیریٹیج سیل، مولانا آزاد لائبریری کے اشتراک سے 19 تا 23 جنوری، مولانا آزاد لائبریری کے کلچرل ہال میں ”تاریخی نقشوں اور مخطوطات کی بحالی“کے موضوع پر ایک ہفتہ پر مشتمل ہنر فروغ پروگرام کا انعقاد کرے گا۔ اس کا ہدف لائبریری میں موجود اے ایم یو کیمپس کے نادر تاریخی نقشوں کے ذخیرے کو محفوظ کرنا ہے، جن میں سے کئی نقشے فوری توجہ کے متقاضی ہیں۔
عملی نوعیت کے اس پروگرام کے تحت تحفظ اور بحالی کے شعبہ کے ماہرین کی نگرانی میں طلبہ اور محققین کو عملی تربیت فراہم کی جائے گی، جس میں صلاحیت سازی اور ثقافتی ورثے کے تحفظ پر خصوصی توجہ دی جائے گی۔ افتتاحی نشست 19 جنوری کو دوپہر ایک بجے مولانا آزاد لائبریری کے کلچرل ہال میں منعقد ہوگی۔ اے ایم یو کے سابق وائس چانسلر محمد گلریز تقریب کے مہمانِ خصوصی ہوں گے، جبکہ پروفیسر محمد پرویز، او ایس ڈی، سلیکشن کمیٹی، مہمانِ اعزازی کی حیثیت سے شرکت کریں گے۔
ہندوستھان سماچار
---------------
ہندوستان سماچار / سید کامران علی گڑھ
