پربھنی، (ہ س)۔ میونسپل کارپوریشن انتخابات کے پیشِ نظر پربھنی ضلع میں پولیس نے بڑے پیمانے پر سخت کارروائی کرتے ہوئے جرائم پیشہ عناصر کے خلاف خصوصی مہم شروع کی ہے۔ گزشتہ دو دنوں کے دوران شہر اور ضلع کے مختلف حصوں میں بیک وقت کارروائیاں انجام دے کر مفرور اور عدالتی وارنٹ والے ملزمان کو حراست میں لیا گیا۔پولیس کے مطابق انتخابی ماحول کو پُرامن رکھنے کے لیے اسلحہ لائسنس ہولڈرز کے گھروں کی جانچ پڑتال کی گئی، جبکہ خطرناک ہتھیار رکھنے والے مشتبہ افراد کے گھروں پر چھاپے مارے گئے۔ اس مہم کے دوران ایک تلوار اور ایک خنجر ضبط کیا گیا، جسے پولیس نے انتخابی امن کے لیے اہم کامیابی قرار دیا ہے۔اس کارروائی میں مجموعی طور پر 62 مفرور ملزمان کو گرفتار کیا گیا، جبکہ 58 افراد کے گھروں کی تلاشی لی گئی جو غیر قانونی اسلحہ رکھنے کے شبہ میں تھے۔ پربھنی دیہی پولیس تھانہ کے زرّی علاقے سے گیانیشور اُدھو پوار (30 سال) کے قبضے سے تلوار برآمد ہوئی، جس پر انڈین آرمز ایکٹ کے تحت مقدمہ درج کیا گیا ہے۔پربھنی شہر کے کوتوَالی پولیس تھانہ حدود میں وندرا سنگھ نانک سنگھ ٹاک، ساکن گرو گووند سنگھ نگر، کے پاس سے ایک خنجر برآمد ہوا، جس پر انڈین آرمز ایکٹ اور مہاراشٹر پولیس ایکٹ کے تحت کارروائی کی گئی۔اسی دوران ناکہ بندی کے دوران ایک موٹر سائیکل سوار وسنت شنکر راو جٹال (47 سال)، ساکن گیانیشور نگر، ساخلہ پلاٹ کے پاس سے 5 لاکھ 60 ہزار روپے نقد رقم ضبط کی گئی۔ اس شخص نے خود کو واٹیکا ہوٹل، بسمت روڈ کا منیجر بتایا۔ یہ کارروائی ایف ایس ٹی کی مدد سے انجام دی گئی۔یہ خصوصی مہم پولیس سپرنٹنڈنٹ رویندرسنگھ پردیشی کی ہدایت اور ایڈیشنل پولیس سپرنٹنڈنٹ سورج گنجال کی قیادت میں چلائی گئی، جس میں دو ڈویژنل پولیس افسران، لوکل کرائم برانچ کے انچارج، 25 پولیس افسران، 19 تھانوں کے انچارج اور تقریباً 190 پولیس اہلکار شامل تھے۔ پولیس نے عندیہ دیا ہے کہ انتخابات کے دوران کسی بھی غیر قانونی سرگرمی کو برداشت نہیں کیا جائے گا اور سخت کارروائیاں جاری رہیں گی۔ہندوستھان سماچار

--------------------

ہندوستان سماچار / جاوید این اے