علی گڑھ, 13 جنوری (ہ س)۔

علی گڑھ مسلم یونیورسٹی میں ’وکست بھارت ینگ لیڈرز ڈائیلاگ 2026‘ کے اختتامی اجلاس کے موقع پر بھارت کے وزیرِ اعظم جناب نریندر مودی کے خطاب کی براہِ راست نشریات کا اہتمام یونیورسٹی کے انتظامی بلاک کے کانفرنس روم اور یونیورسٹی کے زیرِ انتظام مختلف اسکولوں میں کیا گیا۔ اس پروگرام میں بڑی تعداد میں طلبہ، اساتذہ اور ملازمین نے شرکت کی۔ براہِ راست نشریات کے دوران اے ایم یو کی وائس چانسلر پروفیسر نعیمہ خاتون، پرو وائس چانسلر پروفیسر ایم محسن خان، رجسٹرار پروفیسر عاصم ظفر، پراکٹر پروفیسر ایم وسیم علی، پبلک ریلیشنز آفس کی ممبر اِنچارج پروفیسر وبھا شرما، پبلک ریلیشنز آفیسر جناب عمر پیرزادہ سمیت یونیورسٹی کے سینئر افسران، اساتذہ اور انتظامی عملہ موجود تھا۔

وزیرِ اعظم کا یہ خطاب قومی یومِ نوجوانان کے موقع پر منعقد ہونے والے قومی سطح کے مکالمے کا اختتام تھا، جس میں ملک بھر سے آئے ہوئے نوجوان رہنماؤں نے تعلیم، اختراع، صنعت کاری، حکمرانی، ٹیکنالوجی اور سماجی ترقی سے متعلق موضوعات پر غور و خوض کیا۔ اس دوران منتخب نوجوان نمائندوں نے بھارت کی ترقی کے لیے اپنے مشورے اور نقطہ نظر پیش کیے۔

اپنے خطاب میں وزیرِ اعظم نے کہا کہ بھارت کے نوجوان ’وکست بھارت@ 2047‘ کے ہدف کو حقیقت میں بدلنے والی اصل قوت ہیں۔ انہوں نے اختراع، ہنر مندی کی ترقی، تحقیق، صنعت کاری اور سماجی ذمہ داری کے جذبے کی اہمیت پر زور دیا اور نوجوانوں سے قوم کی تعمیر میں سرگرم کردار ادا کرنے کی اپیل کی۔ جدید علم کو بھارت کی تہذیبی اقدار کے ساتھ جوڑنے کی ضرورت پر زور دیتے ہوئے انہوں نے کہا کہ ملک کا مستقبل بااختیار، خوداعتماد اور اقدار سے وابستہ نوجوانوں پر منحصر ہے۔ وزیرِ اعظم نے تعلیمی اداروں سے بھی اپیل کی کہ وہ طلبہ میں قیادت کی صلاحیت، تخلیقی سوچ اور خدمت کے جذبے کو فروغ دیں۔

انہوں نے کہا کہ نوجوانوں کی قیادت میں سامنے آنے والے خیالات اور اقدامات شمولیتی اور پائیدار ترقی کو سمت دینے میں اہم کردار ادا کرتے ہیں۔ پروگرام میں شریک شرکاء نے وزیرِ اعظم کے خطاب کو حوصلہ افزا اور دور اندیش قرار دیا۔ یہ تقریب اے ایم یو برادری کو نوجوان قیادت اور ترقی سے متعلق قومی مکالمے سے اجتماعی طور پر جڑنے کا موقع فراہم کرتی ہے اور طلبہ و اساتذہ میں قومی اقدامات کے تئیں آگہی اور شمولیت کو فروغ دینے کے لیے یونیورسٹی کے عزم کو ایک بار پھر مضبوط کرتی ہے۔

---------------

ہندوستان سماچار / سید کامران علی گڑھ