تل ابیب،03ستمبر(ہ س)۔بیت المقدس میں بدھ کے روز غیض و غضب کا شکار اسرائیلی مظاہرین نے وزیر اعظم بنیامین نیتن یاہو کے گھر کے قریب کوڑے کے کنٹینروں اور ٹائروں کو آگ لگا دی۔ ان کا مطالبہ تھا کہ غزہ کے محصور فلسطینی علاقوں میں قیدیوں کی رہائی کے لیے کوئی سمجھوتا کیا جائے، کیونکہ شہر پر حملہ قریب ہے۔اسرائیلی پولیس نے بیان میں کہا کہ آگ لگانے کی کارروائی سے رحافیا اور جفعات رام کے علاقوں میں کئی گاڑیوں کو نقصان پہنچا، اور کچھ رہائشیوں کو قریبی عمارتوں سے نکالنا پڑا، لیکن کوئی زخمی نہیں ہوا۔ پولیس نے آگ لگانا کے غیر قانونی فعل کو ’غیر ذمے دارانہ‘ قرار دیتے ہوئے خبردار کیا کہ یہ عوام کے لیے خطرہ بن سکتا ہے۔اسی دوران کچھ مظاہرین نے شہر میں نیشنل لائبریری کی چھت پر بھی دھرنا دیا تاکہ اسرائیلی قیدیوں کی رہائی کا مطالبہ کیا جا سکے، پولیس نے انھیں ہٹانے کے لیے کارروائی کی۔ یہ بات اسرائیلی ٹی وی چینل 12 نے بتائی۔

مزید یہ کہ مظاہرین کی گاڑیوں کا قافلہ لطرون کے چوراہے پر جمع ہوا اور وہ بیت المقدس کی جانب روانہ ہوئے۔ اس دوران جنگ بند کرنے اور قیدیوں کی واپسی کے لیے نعرے لگائے گئے۔ یہ احتجاج غزہ میں قیدیوں کے حقوق کے مدافعین کی جانب سے منظم کیا گیا تھا، جسے یوم اضطراب کہا جاتا ہے۔ اس کا مقصد قیدیوں کی حالت زار سے آگاہی بڑھانا اور غزہ میں جنگ کے خاتمے کے لیے دباو¿ ڈالنا ہے تاکہ ایک ایسا معاہدہ طے پایے جو تمام قیدیوں کی واپسی یقینی بنائے۔یہ مظاہرے ایسے وقت میں ہوئے جب نیتن یاہو کی حکومت غزہ شہر پر قبضے کی منصوبہ بندی کر رہی ہے اور بہت سے اسرائیلی ... قیدیوں کی زندگی کے حوالے سے تشویش میں مبتلا ہیں، جن میں سے بعض قیدی ممکنہ طور پر اس شہر میں موجود ہیں۔قطری ثالث کے مطابق نیتن یاہو نے حالیہ ثالثی پیشکش کو قبول کرنے سے انکار کر دیا، جس کا مقصد جنگ روکنا اور قیدیوں کا تبادلہ تھا، جبکہ حماس نے اس پیشکش کو قبول کر لیا۔ تازہ اسرائیلی اندازوں کے مطابق غزہ میں تقریباً 20 اسرائیلی قیدی زندہ ہیں، جبکہ دیگر 28 ہلاک ہو چکے ہیں۔

ہندوستھان سماچار

ہندوستان سماچار / Mohammad Khan