لزبن، 4 ستمبر (ہ س)۔ بدھ کی شام پرتگال کے دارالحکومت لزبن میں گر کر تباہ ہونے والی تاریخی گلوریا ایلیویٹر سیاحتی ٹرین کے حادثے میں مرنے والوں کی تعداد بڑھ کر 17 ہو گئی ہے۔ لزبن سٹی سول پروٹیکشن سروس کی اہلکار مارگریڈا کاسٹرو مارٹنز نے اس کی تصدیق کی۔ پرتگال میں، گلوریا ایلیویٹر کو ایلیواڈور ڈی گلوریا، اسٹریٹ کار اور فنیکولر بھی کہا جاتا ہے۔ دریں اثناء پرتگال میں آج قومی سوگ کا اعلان کیا گیا ہے۔ اسے پرتگال کی تاریخ کا بدترین ریل حادثہ قرار دیا جا رہا ہے۔

’دی پرتگال نیوز‘ اخبار کے مطابق مارٹنز نے بتایا کہ ٹرین میں 38 افراد سوار تھے۔ حادثے میں 15 افراد کی موقع پر ہی موت ہوگئی جب کہ 23 ​​دیگر کو اسپتال میں داخل کرایا گیا۔ ان میں سے دو کی رات کو موت ہو گئی۔ زخمیوں میں 12 خواتین اور 7 مرد شامل ہیں۔ خواتین میں سے ایک حاملہ ہے۔ مرنے والوں میں پرتگال کے چار، اسپین کے دو، کوریا، کیپ وردے، کینیڈا، اٹلی، فرانس، سویڈن اور مراکش کا ایک ایک شہری شامل ہے۔ چار زخمیوں کی شناخت نہیں ہو سکی۔ زخمیوں کو ساؤ ہوزے، سانتا ماریا، ساؤ فرانسسکو زیویئر، کیسکیس اور امادورا سنٹرا کے اسپتالوں میں داخل کرایا گیا ہے۔ دریں اثنا، نیشنل ایمرجنسی میڈیسن انسٹی ٹیوٹ کے پروگرام پلاننگ، اسٹیٹ پروٹوکول اور کرائسز مینجمنٹ یونٹ کے سربراہ ٹیاگو آگسٹو کے مطابق، فائر ڈیپارٹمنٹ نے آٹھ گاڑیاں اور 34 طبی عملے کو جائے وقوعہ پر بھیج دیا ہے جنہوں نے زخمیوں کو اسپتالوں میں پہنچایا۔

حادثے کی وجہ سے ٹرینوں کی آمدورفت متاثر ہوئی ہے۔ گلوریا لفٹ کیریس کمپنی چلاتی ہے۔ یہ ٹرین بیررو آلٹو میں ریسٹوراڈورس کو جارڈیم ڈی ساؤ پیڈرو ڈی الکانٹا سے جوڑتی ہے۔ یہ 265 میٹر طویل راستہ ہے جو سیاحوں میں بہت مقبول ہے۔ امریکی اخبار نیویارک ٹائمز نے پرتگال کی وزارت صحت کے حوالے سے بتایا کہ گلوریا لفٹ ریسٹوراڈورس اسکوائر اور ایوینیڈا ڈی لیبرڈیڈ سے ایک کھڑی پہاڑی پر چڑھتی ہے تاکہ بیرو آلٹو علاقے کے خوبصورت نظاروں تک پہنچ سکے۔ لزبن فائر فائٹرز رجمنٹ نے بتایا کہ حادثہ شام چھ بجے کے بعد ایک کیبل میں فنی خرابی کے باعث پیش آیا۔ گلوریا لفٹ ایک عمارت سے ٹکرا کر گر کر تباہ ہو گئی۔ لزبن کے میئر کارلوس موئڈاس نے بتایا کہ رات 8:30 بجے تک تمام متاثرین کو اسپتال لے جایا گیا تھا۔ لزبن سوگ میں ہے۔ یہ شہر کے لیے افسوسناک لمحہ ہے۔ پرتگال کے صدر مارسیلو ریبیلو ڈی سوسا نے اس سانحے سے متاثرہ خاندانوں سے تعزیت کا اظہار کیا ہے۔

ہندوستھان سماچار

---------------

ہندوستان سماچار / عبدالواحد