نئی دہلی ؍ لکھنؤ، 20ستمبر(ہ س)۔

عام آدمی پارٹی کے سینئر رہنما اور راجیہ سبھا کے رکن سنجے سنگھ نے اتر پردیش میں سرکاری نوکریوں میں ریزرویشن کی کھلی خلاف ورزی پر بی جے پی کی یوگی آدتیہ ناتھ حکومت کو آڑے ہاتھوں لیا۔ انہوں نے کہا کہ اتر پردیش میں بھرتی گھوٹالا ہو رہا ہے۔ یوگی حکومت دلتوں، پسماندہ طبقات اور آدیواسیوں کے حق کی نوکریاں اعلیٰ ذات والوں کو دے رہی ہے۔ باندا زرعی یونیورسٹی میں 15 عہدوں پر بھرتی ہوئی، جن میں سے 11 ٹھاکر، 2 جنرل اور صرف 2 دلت و پسماندہ کو ملازمت ملی۔ اسی طرح، لکھیم پور کوآپریٹو بینک میں 27 عہدوں پر بھرتی ہوئی، جس میں 15 ٹھاکر، 4 جنرل اور 8 پسماندہ، دلت اور آدیواسی منتخب کیے گئے۔ خود کو پسماندہ طبقات کا لیڈر بتانے والے مودی جی دلتوں، پسماندہ طبقات اور آدیواسیوں کا حق مارے جانے پر خاموش ہیں، جس سے ان طبقات میں غصہ بڑھ رہا ہے۔ ہم مطالبہ کرتے ہیں کہ اس بھرتی گھوٹالے کی تحقیقات ہو، قصورواروں کو سزا دی جائے اور ریزرویشن کو پوری طرح نافذ کیا جائے۔سنجے سنگھ نے کہا کہ میں بھی بھارت ماتا کی جے کا نعرہ لگاتا ہوں اور بی جے پی والے بھی لگاتے ہیں۔ لیکن بی جے پی والے صرف ہندووں کو اکٹھا کرنے اور ہندووں کے نام پر سیاست کرنے کی بات کرتے ہیں۔ سوال یہ ہے کہ اگر بھارت ماتا کے بیٹوں کے ساتھ ناانصافی ہوگی تو بھارت ماتا کی جے کیسے ہوگی؟ ہندووں کو ایک کرنے کی بات کرنے والے لوگ بتائیں کہ کیا پسماندہ، دلت اور آدیواسی ہندو نہیں ہیں؟ کیا انہیں آئین میں دیے گئے حقوق اور ریزرویشن کا حق نہیں ملنا چاہیے؟ ملک میں 50 فیصد ریزرویشن پسماندہ، دلت اور آدیواسیوں کے لیے ہے۔ 10 فیصد ریزرویشن جنرل طبقے کے غریبوں کے لیے ہے۔ اس کے بعد جو نوکریاں بچتی ہیں وہ جنرل طبقے کو دی جا سکتی ہیں۔ لیکن اتر پردیش میں بھرتیوں میں گھوٹالے ہو رہے ہیں۔

سنجے سنگھ نے کہا کہ کئی بھرتی امتحانات کے پیپر لیک ہو جاتے ہیں، لیکن حکومت اس کی ذمہ داری نہیں لیتی۔ لاکھوں نوجوان فارم بھرتے ہیں لیکن انہیں نوکری کے بجائے لاٹھیاں ملتی ہیں۔ کیا اتر پردیش کے نوجوان صرف لاٹھی کھانے کے لیے پیدا ہوئے ہیں؟ پریاگ راج، لکھنو، گورکھپور، بنارس سمیت ہر جگہ نوجوانوں کو لاٹھیاں سہنی پڑتی ہیں۔ آج اتر پردیش میں نوکری مانگنے والے نوجوانوں کی حالت نہایت خستہ ہے۔سنجے سنگھ نے کہا کہ اتر پردیش حکومت اور اس کے سربراہ یوگی آدتیہ ناتھ کا کام سرکاری نوکریوں میں بھرتی گھوٹالا کرنا بن گیا ہے۔ یہ گھوٹالے اتنے کھلے عام ہیں کہ سب کو نظر آ رہے ہیں۔ بھلے ہی میری اعلیٰ ذات کے لوگ ناراض ہو جائیں، لیکن میں بار بار کہتا ہوں کہ اگر ذات پات کے نام پر سیاست کرو گے تو دوسری ذاتوں کے غصے اور عدم اطمینان کا شکار بنو گے۔ آج اتر پردیش میں یہی ہو رہا ہے۔ سنجے سنگھ نے کہا کہ اتر پردیش میں وزیراعلیٰ اور ان کے چہیتے اپنی ذات کے نوجوانوں کو نوکریوں میں بھر رہے ہیں اور دوسری ذاتوں کا ریزرویشن ہڑپ رہے ہیں۔ وہ سمجھتے ہیں کہ اس سے وہ طاقتور بن جائیں گے، لیکن وہ بھول رہے ہیں کہ ایسا کرنے سے 80-85 فیصد دوسری ذاتوں میں بے چینی اور غصہ پھیل رہا ہے۔ اعلیٰ ذات کے کچھ لوگ خوش ہیں کہ 27 میں سے 15 نوکریاں انہیں مل گئی ہیں، لیکن وہ یہ بھول رہے ہیں کہ اس سے باقی 85 فیصد ذاتوں کا غصہ ان پر پھوٹے گا۔ سنجے سنگھ نے کہا کہ وزیراعظم مودی خود کو پسماندہ طبقات کا لیڈر بتاتے ہیں، لیکن اتر پردیش کی صورتحال بالکل اس کے برعکس ہے۔ باندا کے زرعی یونیورسٹی میں ایک بھرتی میں 11 ٹھاکر، 2 جنرل اور صرف 2 پسماندہ، دلت اور آدیواسی منتخب کیے گئے۔ لکھیم پور کے کوآپریٹو بینک میں 27 میں سے 15 ٹھاکر، 4 جنرل اور صرف 8 پسماندہ، دلت اور آدیواسی لیے گئے۔ سنجے سنگھ نے سوال اٹھایا کہ 27 میں سے 15 نوکریاں اپنی ذات کے لوگوں کو دے کر کیا پورے اتر پردیش کے ٹھاکروں کا بھلا ہو رہا ہے؟ نہیں، یہ ٹھاکروں کا بھلا نہیں ہے۔ اس سے وزیراعلیٰ یوگی آدتیہ ناتھ ٹھاکروں کو 85 فیصد دوسری ذاتوں کے غصے کا نشانہ بنا رہے ہیں۔ اس کا کوئی فائدہ نہیں ہے۔ بھرتی گھوٹالا سب کے سامنے ہے، پھر بھی وزیراعظم مودی جی خاموش ہیں۔ اگر وہ پسماندہ طبقات کے لیڈر ہیں تو پسماندہ، دلت اور آدیواسیوں کا ریزرویشن مارے جانے پر کیوں نہیں بولتے؟ بی جے پی کے دلت، پسماندہ، انتہائی پسماندہ اور آدیواسی لیڈروں کے منہ پر تالہ کیوں لگا ہے؟ وہ کیوں خاموش ہیں؟ سنجے سنگھ نے کہا کہ بی جے پی اور آر ایس ایس اس ملک میں آئین اور ریزرویشن کی پالیسی کو ختم کرنا چاہتے ہیں۔ آر ایس ایس کے 100 سال گزر گئے لیکن اس کا ایک بھی سربراہ پسماندہ، دلت یا آدیواسی ذات سے نہیں رہا۔ پھر ایسی پارٹی اور تنظیم سے کیسے امید کریں کہ وہ ہمارے ساتھ انصاف کرے گی؟ یہ کبھی نہیں ہوگا۔ اس لیے اس بھرتی گھوٹالے کی سخت جانچ ہونی چاہیے، قصورواروں کو جیل بھیجا جائے اور ریزرویشن کو پوری طرح نافذ کیا جائے۔

ہندوستھان سماچار

ہندوستان سماچار / Mohammad Khan