نئی دہلی، 16 ستمبر (ہ س)۔ دہلی کی وزیر اعلیٰ ریکھا گپتا نے منگل کو شمالی دہلی کے میٹرو مال میں منعقدہ وشوکرما پوجا تہوار میں شرکت کی اور کمیونٹی کے لوگوں سے بات چیت کے ساتھ ساتھ کارکنوں کو اعزاز سے نوازا۔ اس موقع پر کابینی وزیر کپل مشرا اور دیگر موجود تھے۔
وزیر اعلیٰ نے وشوکرما ڈے پر تمام مزدوروں اور کارکنوں کو مبارکباد دیتے ہوئے کہا کہ یہ دن مزدوروں کے لیے اپنے پیارے بھگوان وشوکرما کی پوجا کرنے کا ایک خاص موقع ہے۔ دہلی حکومت ہر مزدور خاندان کے ساتھ ہے اور اس کا عزم ہے کہ مزدوروں کی بہبود کی اسکیموں کو ہر ضرورت مند تک پہنچایا جائے۔
گپتا نے کہا کہ وزیر اعظم نریندر مودی کے وژن اور لگن نے مزدوروں کی بہبود کو قومی ترجیح بنا دیا ہے۔ انہوں نے پچھلی حکومت کو نشانہ بناتے ہوئے کہا کہ پہلے اسکیمیں صرف کاغذوں تک محدود تھیں لیکن موجودہ حکومت ان پر موثر طریقے سے عملدرآمد کررہی ہے۔
وزیر اعلیٰ نے کہا کہ وزیر اعظم کے یوم پیدائش کے موقع پر دہلی حکومت سیوا پکھواڑا کے تحت 500 کریچ عوام کو وقف کر رہی ہے۔ یہ کریچ وشوکرما برادری کی ماؤں کو ان کے بچوں کی دیکھ بھال اور تغذیہ کے ساتھ روزی روٹی کی حفاظت فراہم کریں گے۔
انہوں نے کہا، وشوکرما بھائیوں اور بہنوں کی محنت اور ہنر دہلی اور ملک کے دلوں کی دھڑکن ہیں۔ حکومت کم از کم اجرت میں اضافہ، مستقل مکانات، بچوں کی تعلیم اور مفت علاج جیسی اسکیموں کے ذریعے ہمہ جہت ترقی کے لیے پرعزم ہے۔ انہوں نے کہا کہ دہلی میں آیوشمان بھارت اسکیم کے تحت ہر مزدور خاندان کے لیے 10 لاکھ روپے تک کا مفت علاج یقینی بنایا گیا ہے۔
اس دوران وزیر کپل مشرا نے وشوکرما پوجا پر آلات کی پوجا کی اور کارکنوں کے روشن مستقبل کی خواہش کی۔ انہوں نے کہا کہ دہلی حکومت کارکنوں سے براہ راست بات چیت کرکے وزیر اعظم کے خوابوں کو پورا کرنے کی سمت کام کر رہی ہے۔
---------------
ہندوستان سماچار / عبدالسلام صدیقی
