جموں, 9 اگست (ہ س)۔

جموں و کشمیر پولیس کٹھوعہ نے تھانہ بلاور میں درج ایک پرانے مقدمے میں مفرور ملزم کے خلاف سخت کارروائی عمل میں لاتے ہوئے ضابطہ فوجداری کی دفعہ 87 کے تحت عوامی اعلامیہ جاری کر دیا ہے۔ یہ مقدمہ ایف آئی آر نمبر 43/2010 کے تحت اسلحہ ایکٹ کی دفعہ 4/25 اور دفعہ 120 آر پی سی میں درج ہے۔

پولیس کے مطابق، ملزم متعدد کوششوں کے باوجود گرفتاری سے بچتا رہا ہے۔ اس کی شناخت وشال کمار عرف وِشو ولد دینا ناتھ سکنہ پنج تیرتھی، ضلع جموں کے طور پر کی گئی ہے۔

قانونی تقاضوں کے تحت پولیس نے ملزم کے آخری معلوم پتے پر اعلامیہ چسپاں کیا اور اس کے آبائی علاقے میں ڈھول بجا کر اور لاؤڈ اسپیکر کے ذریعے عوامی اعلان کیا، جس میں اسے مقررہ مدت میں عدالت کے سامنے پیش ہونے کا حکم دیا گیا۔

پولیس نے عوام سے اپیل کی ہے کہ مفرور کے بارے میں کسی بھی قسم کی اطلاع قریبی پولیس اسٹیشن کو فراہم کریں۔ کسی بھی شخص کو ملزم کو پناہ دینے یا مدد فراہم کرنے کی صورت میں قانون کے مطابق سخت کارروائی کا سامنا کرنا پڑے گا۔

ہندوستھان سماچار

---------------

ہندوستان سماچار / محمد اصغر