ممبئی، 06 اگست (ہ س)۔ عالمی تجارتی محاذ پر غیر یقینی صورتحال کے درمیان، ریزرو بینک آف انڈیا (آر بی آئی) کے گورنر سنجے ملہوترا نے کہا کہ مرکزی بینک آر بی آئی اقتصادی ترقی کو فروغ دینے کے لیے تمام ضروری اقدامات کر رہا ہے۔ انہوں نے کہا کہ ایسی صورتحال میں جو بھی ضروری ہوگا، ہم کرتے رہیں گے۔ بیشک، تجارتی مذاکرات ابھی جاری ہیں۔ہمیں امید ہے کہ ہم ایک پرامن حل تلاش کر لیں گے۔

میڈیا سے بات چیت کے دوران پوچھے گئے ایک سوال کے جواب میں، آر بی آئی گورنر نے کہا کہ یو پی آئی ہمیشہ مفت نہیں رہے گا۔ انہوں نے یہ بھی کہا کہ آخرکار کسی کو ڈیجیٹل ادائیگی کا نظام چلانے کا خرچ اٹھانا پڑے گا۔ سنجے ملہوترا کا یہ تبصرہ یو پی آئی ماحولیاتی نظام میں نمایاں تبدیلی کے درمیان آیا ہے۔

پریس کانفرنس میں سنجے ملہوترا نے واضح کیا کہ میں نے کبھی نہیں کہا کہ یو پی آئی ہمیشہ کے لیے مفت رہ سکتا ہے۔ میں نے صرف اتنا کہا تھاکہ یو پی آئی لین دین سے وابستہ اخراجات ہوتے ہیں اور کسی نہ کسی کو انہیں ادا کرنا ہوگا۔ اس لیے اس ماڈل کی پائیداری کے لیے، یہ ہمارے لیے ضروری ہے کہ اجتماعی یا انفرادی طور پر کوئی نہ کوئی ادائیگی کرے۔

انہوں نے کہا کہ ہمارے لیے ملک کے شہریوں کا مفاد اور فلاح و بہبود سب سے مقدم ہے۔ ملک کے شہری خصوصاً وہ لوگ جو معاشرے کی نچلی سطح پر ہیں، ہمارے وجود کی بنیادی وجہ ہیں۔ اس کے علاوہ، انہوں نے کہا کہ مرکزی بینک متوفیوں کے بینک کھاتوں اور لاکرز کے دعووں کے تصفیہ کے عمل کو آسان اور معیاری بنائے گا۔

آر بی آئی نے موجودہ مالی سال 2025-26 کی تیسری دو ماہی ایم پی سی جائزہ میٹنگ کے بعد پالیسی ریٹ ریپو ریٹ میں کوئی تبدیلی نہیں کی ہے۔ آر بی آئی نے ریپو ریٹ کو 5.50 فیصد پر برقرار رکھا ہے۔ اس کے ساتھ ساتھ، مالی سال 2025-26 کے لیے مجموعی گھریلو پیداوار (جی ڈی پی) کی شرح نمو کا تخمینہ 6.5 فیصد پر برقرار رکھا گیا ہے۔ خوردہ افراط زر کی شرح کا تخمینہ 3.1 فیصد تک کم کر دیا گیا ہے۔

ہندوستھا ن سماچار

ہندوستان سماچار / محمد شہزاد