نئی دہلی، 18 اگست (ہ س)۔ وزیر اعظم نریندر مودی نے پیر کو Axiom-4 خلائی مشن کے پائلٹ اور خلاباز شبھانشو شکلا سے ملاقات کی اور اسے ملک کے لیے ایک قابل فخر لمحہ قرار دیا۔ یہ میٹنگ سائنس، ٹکنالوجی اور ہندوستان کے انسانی خلائی مشن گگنیان سے متعلق مختلف پہلوؤں پر بھرپور گفتگو کا موقع بن گئی۔
وزیر اعظم کے دفتر کی طرف سے جاری کردہ معلومات کے مطابق، اس ملاقات کے دوران دونوں کے درمیان خلاء میں تجربات، سائنسی ترقی اور ہندوستان کے مہتواکانکشی گگنیان مشن پر وسیع تبادلہ خیال ہوا۔ اس موقع کو تاریخی قرار دیتے ہوئے وزیر اعظم نے شبھانشو شکلا کے تعاون کو ہندوستان کے خلائی سفر کے لیے ایک تحریک قرار دیا۔
وزیر اعظم مودی نے اپنے آفیشل ایکس ہینڈل پر لکھا، شبھانشو شکلا کے ساتھ شاندار بات چیت ہوئی۔ ہم نے خلاء میں ان کے تجربات، سائنس اور ٹیکنالوجی میں ترقی اور ہندوستان کے مہتواکانکشی گگنیان مشن سمیت بہت سے موضوعات پر تبادلہ خیال کیا۔ ہندوستان کو ان کی کامیابیوں پر فخر ہے۔
وزیر اعظم کی طرف سے ایکس پر شیئر کی گئی میٹنگ کی تصویروں میں شبھانشو شکلا اسرو کی خلاباز جیکٹ پہنے نظر آ رہے ہیں۔ ایک تصویر میں وزیر اعظم کو شکلا کے ساتھ کندھے پر ہاتھ رکھ کر چلتے ہوئے دیکھا جا سکتا ہے۔ اس میٹنگ میں شکلا نے وزیر اعظم کو Axiom-4 مشن پیچ اور بین الاقوامی خلائی اسٹیشن (آئی ایس ایس) سے لی گئی زمین کی تصاویر پیش کیں۔
وزیر اعظم مودی کے اس پوسٹ کے بعد شبھانشو شکلا کو سوشل میڈیا پر ڈھیروں مبارکبادیں مل رہی ہیں۔
قابل ذکر ہے کہ شوبھانشو شکلا نے حال ہی میں خلا میں ایک قابل ذکر کارنامہ انجام دیا ہے، جس سے ہندوستان کے خلائی پروگرام کو بین الاقوامی سطح پر ایک نئی شناخت ملی ہے۔ ان کے اس سفر کو ہندوستان کے خلائی پروگرام میں سنگ میل قرار دیا جا رہا ہے۔
---------------
ہندوستان سماچار / عبدالسلام صدیقی
