کولکاتا، 14 اگست (ہ س)۔ مرکزی حکومت انڈین انسٹی ٹیوٹ آف ٹیکنالوجی (آئی آئی ٹی) کھڑگپور کی 75 ویں سالگرہ کے موقع پر چاندی کا خصوصی یادگاری سکہ جاری کرے گی۔ یہ سکہ صرف جمع کرنے والوں کے لیے ہو گا اور اسے لین دین میں استعمال نہیں کیا جا سکتا۔
مرکزی وزارت خزانہ نے حال ہی میں اس سلسلے میں ایک نوٹیفکیشن جاری کیا ہے۔ 40 گرام وزنی یہ 75 روپے کا سکہ 99.9 فیصد خالص چاندی کا بنے گا۔ سکے کا قطر 44 ملی میٹر ہوگا۔ یہ سکہ کولکاتا ٹکسال سے 18 اگست کو آئی آئی ٹی کھڑگپور کے یوم تاسیس پر جاری کیا جائے گا اور اسے جمع کرنے والوں کو 7500 روپے کی خوردہ قیمت پر دستیاب کیا جائے گا۔
آئی آئی ٹی کھڑگپور کے ڈائریکٹر سمن چکرورتی نے جمعرات کو کہا کہ انسٹی ٹیوٹ کی 75 ویں سالگرہ کے موقع پر 75 روپے کا یادگاری چاندی کا سکہ جاری کیا جا رہا ہے۔ حکومت ہند نے اسے منظوری دے دی ہے اور اسے ہمارے یوم تاسیس پر جاری کیا جائے گا۔
آئی آئی ٹی کھڑگپور ملک کا سب سے قدیم آئی آئی ٹی ہے، جو 1951 میں قائم کیا گیا تھا۔ اسے قومی اہمیت کے انسٹی ٹیوٹ کا درجہ حاصل ہے اور اسے 2019 میں 'انسٹی ٹیوٹ آف ایمینینس' کا درجہ بھی دیا گیا تھا۔ 2,000 ایکڑ پر پھیلے ہوئے اس کیمپس کو ملک کے بڑے تکنیکی مرکزوں میں سے ایک سمجھا جاتا ہے۔
ہندوستھا ن سماچار
ہندوستان سماچار / محمد شہزاد
