لکھنؤ، 12 اگست (ہ س)۔ بہوجن سماج پارٹی (بی ایس پی) کی قومی صدر مایاوتی نے اتر پردیش کے فتح پور ضلع میں مقبرے پرجاری تنازعہ پر اپنا ردعمل ظاہر کیا ہے۔ انہوں نے ریاستی حکومت سے اس معاملے کو سنجیدگی سے لینے اور مناسب کارروائی کرنے کا مطالبہ کیا ہے۔

بی ایس پی سربراہ مایاوتی نے منگل کو انسٹاگرام پر پوسٹ کیا کہ یوپی کے فتح پور ضلع میں مقبرے اور مندر کو لے کر تنازعہ چل رہا ہے۔ پیر کے روز، کچھ لوگوں نے متنازعہ جگہ پر ہنگامہ کیا۔ تاہم ضلع اور انتظامیہ نے اسے کنٹرول کیا۔ انہوں نے کہا کہ حکومت کو کسی بھی کمیونٹی کو ہنگامہ آرائی پر ایسا کوئی قدم اٹھانے کی اجازت نہیں دینی چاہئے جس سے فرقہ وارانہ کشیدگی پیدا ہو۔ باہمی بھائی چارے اور ہم آہنگی کو بھی درہم برہم نہیں کرنا چاہیے۔ حکومت اس معاملے کو سنجیدگی سے لے اور ضرورت پڑنے پر سخت کارروائی کرے۔

قابل ذکر ہے کہ پیر کو فتح پور میں ہندو تنظیم کے لوگ مقبرے پر پہنچ گئے اور توڑ پھوڑ کی اور بگھوا جھنڈا لہرایا۔ اس سے دونوں برادریوں کے درمیان تناؤ کی صورتحال پیدا ہوگئی۔ ضلعی اور پولیس انتظامیہ نے لوگوں کو سمجھا کر پرسکون کیا۔ موقع پر پولیس فورس تعینات کر دی گئی۔ اس معاملے میں فتح پور پولیس نے ویڈیو کی بنیاد پر 10 نامزد افراد سمیت 150 لوگوں کے خلاف مقدمہ درج کیا ہے اور گرفتاریاں کی جارہی ہیں۔

ہندوستھان سماچار

---------------

ہندوستان سماچار / عبدالواحد