اسلام آباد، 31 جولائی (ہ س)۔

پاکستان اور امریکہ نے بدھ کی شب واشنگٹن میں تجارتی معاہدے کو حتمی شکل دے دی ہے۔ پاکستان نے اس پر ٹیرف چھوٹ ملنے کی امید ظاہر کی ہے۔ اگرچہ پاکستان نے اس تجارتی معاہدے کی تفصیلات نہیں بتائیں تاہم امریکی صدر ڈونالڈ جے ٹرمپ نے اس معاہدے کا حوالہ دیا ہے جس کا مقصد پاکستان کے تیل کے ذخائر کو ترقی دینے میں مدد فراہم کرنا ہے۔

ڈان اخبار کی ایک رپورٹ کے مطابق پاکستان کے وزیر خزانہ محمد اورنگزیب ٹیرف پر بات چیت کے لیے واشنگٹن میں ہیں۔ انہوں نے بدھ کو سینئر امریکی حکام سے بھی بات چیت کی۔ امریکہ میں پاکستانی سفارت خانے نے جمعرات کی صبح ایکس پر تجارتی معاہدے کو حتمی شکل دینے کا ذکر کیا۔ ٹرمپ نے جمعرات کی صبح اپنے ٹروتھ سوشل پر لکھا، ہم نے ابھی پاکستان کے ساتھ ایک معاہدے پر دستخط کیے ہیں جس کے تحت پاکستان اور امریکہ ہمارے تیل کے وسیع ذخائر کو ترقی دینے کے لیے مل کر کام کریں گے۔ ہم تیل کمپنی کی تلاش میں ہیں جو اس شراکت کی قیادت کرے گی۔

ڈان کے مطابق، دونوں فریقوں نے ابھی تک کوئی باضابطہ اعلان نہیں کیا ہے کہ ٹیرف کی کس شرح پر اتفاق کیا گیا ہے، تاہم پاکستانی سفارت خانے کا کہنا ہے کہ معاہدے کے نتیجے میں ٹیرف میں کمی کی جائے گی۔ یہ معاہدہ امریکی وزیر تجارت ہاورڈ لٹنک اور امریکی تجارتی نمائندے کے سفیر جیمیسن گریر کے درمیان ملاقات کے دوران طے پایا۔ ملاقات میں سیکرٹری تجارت جواد پال اور امریکہ میں پاکستان کے سفیر رضوان سعید شیخ بھی موجود تھے۔ وزیراعظم شہباز شریف نے معاہدے کو حتمی شکل دینے میں قائدانہ کردار پر ٹرمپ کا شکریہ ادا کیا ہے۔ آج صبح وزیر خارجہ اسحاق ڈار نے بھی تجارتی معاہدے کی تصدیق کی تاہم انہوں نے کوئی تفصیلات نہیں بتائیں۔ ششی تھرور نے بھارت پر 25 فیصد ٹیرف کو امریکی سودا قرار دیا۔

ہندوستھا ن سماچار

ہندوستان سماچار / عطاءاللہ