کولکاتا، 3 جولائی (ہ س)۔ راجیہ سبھا ایم پی اور بھارتیہ جنتا پارٹی (بی جے پی) کے سینئر لیڈر شمک بھٹاچاریہ کو جمعرات کو پارٹی کی مغربی بنگال یونٹ کا نیا صدر مقرر کیا گیا۔ وہ 2026 کے اسمبلی انتخابات میں پارٹی کی قیادت کریں گے، جو اب ایک سال سے بھی کم وقت میں ہونے والے ہیں۔

61 سالہ بھٹاچاریہ کو بلامقابلہ منتخب قرار دیا گیا۔ بدھ کو نامزدگی کی آخری تاریخ تک کسی اور امیدوار نے پرچہ نامزدگی داخل نہیں کیا۔ پارٹی کی طرف سے ان کا باضابطہ اعلان کولکاتا کے سائنس سٹی میں ایک پروقار تقریب کے دوران کیا گیا۔ اس موقع پر سابق مرکزی وزیر اور قومی انتخابی افسر روی شنکر پرساد موجود تھے۔ بھٹاچاریہ کو انتخابی سرٹیفکیٹ دیتے ہوئے، انہوں نے کہا، مغربی بنگال بی جے پی صدر کے عہدے کے لیے صرف ایک کاغذات نامزدگی داخل کیا گیا تھا اور وہ شمک بھٹاچاریہ کا تھا۔ میں انہیں تہہ دل سے مبارکباد دیتا ہوں۔

سبکدوش ہونے والے صدر سکانتا مجومدار اور اسمبلی میں قائد حزب اختلاف سویندو ادھیکاری بھی پرچہ نامزدگی داخل کرتے وقت ریاستی بی جے پی دفتر، سالٹ لیک میں شمک بھٹاچاریہ کے ساتھ موجود تھے۔

شمک بھٹاچاریہ ریاستی بی جے پی کی کمان ایسے وقت سنبھال رہے ہیں جب ریاست میں اگلے سال اسمبلی انتخابات ہونے والے ہیں اور پارٹی اپنے تنظیمی ڈھانچے کو مضبوط بنانے کے لیے سرگرم ہے۔ ان کی تقرری کو بی جے پی کے اسٹریٹجک نقطہ نظر سے ایک اہم قدم قرار دیا جا رہا ہے، خاص طور پر ایسے وقت میں جب پارٹی ریاست میں اپنی بنیاد مضبوط کرنے کی کوشش کر رہی ہے۔

---------------

ہندوستان سماچار / عبدالسلام صدیقی