شملہ، 3 جولائی (ہ س)۔ ہماچل پردیش میں مانسون کی بارش جاری ہے اور آج بھی موسم خراب ہے۔ دارالحکومت شملہ سمیت بیشتر مقامات پر موسلا دھار بارش ہوئی ہے۔ محکمہ موسمیات نے اگلے 24 گھنٹوں میں سیلاب کا خطرہ ظاہر کرتے ہوئے کانگڑا، منڈی، حمیر پور، شملہ، سرمور اور سولن اضلاع کے لیے وارننگ جاری کی ہے۔ محکمہ نے آج اور کل ریاست کے کچھ حصوں میں موسلادھار بارش کے امکان کے پیش نظر ایلو الرٹ بھی جاری کیا ہے، جبکہ 5 جولائی سے 9 جولائی تک ریاست کے مختلف علاقوں میں موسلادھار سے بہت زیادہ بارش کے امکان کے پیش نظر اورنج الرٹ جاری کیا گیا ہے۔

راجدھانی شملہ سمیت کئی علاقوں میں کل رات موسلا دھار بارش ہوئی، جس میں سرمور کے پچھڈ میں سب سے زیادہ 133 ملی میٹر بارش ریکارڈ کی گئی، جب کہ ہمیر پور کے برسر میں 92 ملی میٹر، شملہ کے جبارہٹی میں 59 ملی میٹر، اونا میں 55 ملی میٹر، نہان میں 42 ملی میٹر، کانگڑا میں 32 ملی میٹر، سرہ نگر میں 32 ملی میٹر، شملہ میں 32 ملی میٹر اور سرہان میں 19 ملی میٹر بارش ریکارڈ کی گئی۔ مسلسل بارش کی وجہ سے ریاست میں کم سے کم درجہ حرارت گر گیا ہے اور زندگی درہم برہم ہو کر رہ گئی ہے۔

کلو ضلع میں سنو گیلری کے قریب نالے میں پانی بھر جانے کی وجہ سے منالی-کیلونگ سڑک آج صبح بند ہو گئی ہے اور بارڈر روڈز آرگنائزیشن سڑک کی بحالی کا کام کر رہی ہے، جب کہ اس سڑک کے بند ہونے کی وجہ سے منالی اور کیلونگ کے درمیان ٹریفک روہتانگ پاس سے ہو رہی ہے۔ منڈی ضلع میں پیر کی رات بادل پھٹنے کے کئی واقعات سے تباہی ہوئی ہے، جہاں اب تک 11 لوگوں کی موت ہو چکی ہے اور 34 لوگ لاپتہ ہیں، جن کی تلاش این ڈی آر ایف، ایس ڈی آر ایف اور مقامی انتظامیہ کی ٹیمیں کر رہی ہے۔

ریاستی ایمرجنسی آپریشن سینٹر کی رپورٹ کے مطابق 20 جون سے ریاست میں بارش سے متعلق حادثات میں 63 افراد کی موت ہو چکی ہے اور 109 لوگ زخمی ہو چکے ہیں۔ جمعرات کی صبح تک ریاست بھر میں مٹی کے تودے اور ملبہ گرنے سے 261 سڑکیں بند ہیں، جن میں صرف منڈی میں 186، کلو میں 37 اور کانگرا میں 112 سڑکیں شامل ہیں۔ بارش کی وجہ سے ریاست بھر میں 599 بجلی کے ٹرانسفارمر خراب ہیں جن میں سے منڈی ضلع میں ہی 511 ٹرانسفارمر بند پڑے ہیں اور ان میں سے 258 ٹرانسفارمر صرف گوہر سب ڈویژن میں متاثر ہوئے ہیں۔ پانی کی فراہمی کا نظام بھی درہم برہم ہوگیا ہے اور ریاست کی 797 پینے کے پانی کی اسکیمیں بند کردی گئی ہیں، جن میں منڈی میں 580، حمیر پور میں 144 اور کلو ضلع کی 33 اسکیمیں شامل ہیں۔ محکمہ موسمیات نے لوگوں سے محتاط رہنے کی اپیل کی ہے، دریاؤں اور ندی نالوں سے دور رہیں اور لینڈ سلائیڈنگ سے متاثرہ علاقوں کا سفر کرنے سے گریز کریں۔

ہندوستھان سماچار

---------------

ہندوستان سماچار / عبدالواحد