جموں, 3 جولائی (ہ س)۔ سالانہ امرناتھ یاترا جمعرات کی صبح شروع ہوئی جب پہلے قافلے نے بالتل اور نونون کے دو اہم بیس کیمپوں سے جنوبی کشمیر کے ہمالیائی سلسلے میں واقع 3880 میٹر بلند مقدس غار کی جانب روانگی اختیار کی، جہاں قدرتی طور پر برف سے بنی لنگم کا دیدار کیا جاتا ہے۔

یاترا علی الصبح دو روایتی راستوں 48 کلومیٹر طویل ننوان پہلگام اور 14 کلومیٹر کے نسبتاً مختصر بالتل ٹریک سے شروع ہوئی۔ مرد، خواتین اور سادھوؤں پر مشتمل ہزاروں عقیدت مندوں نے ‘بم بم بھولے’ کے گونجتے نعروں کے درمیان اپنے روحانی سفر کا آغاز کیا۔ بیس کیمپوں پر تعینات اعلیٰ افسران نے ان قافلوں کو باقاعدہ طور پر روانہ کیا۔

دو جولائی کو جموں کے بھگوتی نگر یاترا بیس کیمپ سے پہلے قافلے کو لیفٹیننٹ گورنر منوج سنہا نے جھنڈی دکھا کر روانہ کیا۔ اس قافلے میں 5,892 یاتری شامل تھے جو دوپہر کے وقت وادی کشمیر پہنچے، جہاں انتظامیہ اور مقامی عوام نے ان کا پرجوش خیرمقدم کیا۔

یاتری قدرتی برف سے بنی مقدس لنگم کے درشن کے لیے غار میں حاضری دیں گے۔ یاترا کے پُرامن اور محفوظ انعقاد کو یقینی بنانے کے لیے سخت ترین حفاظتی انتظامات عمل میں لائے گئے ہیں۔ پولیس، سی آر پی ایف، آئی ٹی بی پی اور دیگر نیم فوجی دستوں کی بھاری نفری تعینات کی گئی ہے، جبکہ حساس علاقوں میں فضائی نگرانی بھی کی جائے گی۔

ہندوستھان سماچار

---------------

ہندوستان سماچار / محمد اصغر