پٹنہ،26جولائی(ہ س)۔راشٹریہ جنتا دل (آر جے ڈی) کے رہنما تیجسوی پرساد یادو نے بہار میں اجتماعی عصمت دری سمیت بڑھتے ہوئے جرائم پر ہفتہ کے روزوزیر اعظم نریندرمودی اورعوام کے نام ایک کھلا خط لکھا۔ انہوں نے ریاست میں نیشنل ڈیموکریٹک الائنس (این ڈی اے) حکومت کو شیطانی راج قرار دیا اور اس کے قائدین کی خاموشی پر سوال اٹھایا۔تیجسوی نے ایکس پر پوسٹ کردہ خط میں بہار میں بڑھتے ہوئے جرائم پر تشویش کا اظہار کیا۔ گیا ضلع میں ہوم گارڈ کی بھرتی میں حصہ لینے کے لیے آئی ایک لڑکی کی دوڑ کے دوران بے ہوش ہونے کے بعد ایمبولینس میں اجتماعی عصمت دری کا حوالہ دیتے ہوئے تیجسوی نے سوال کیا کہ ایسی صورت حال کو کیا کہا جائے؟ ہم بہار میں اس شیطانی راج یا مجرموں کی سرپرستی کرنے والی حکومت کو کیا کہیں گے؟ کیا یہ مہاجنگل راج (انتہائی لاقانونیت) ہے یا مودی ووزیر اعلیٰ نتیش کمار کی غلط حکمرانی ہے۔آر جے ڈی لیڈر نے کہا کہ مودی اور نتیش کے شیطانی راج میں ہر روز ماؤں، بہنوں، بیٹیوں اور معصوم بچیوں کی عزت لوٹی جا رہی ہے، لیکن کوئی بھی وزیر یا نائب وزیر اعلیٰ جرائم، عصمت دری اور بدعنوانی کے بے قابو واقعات پر بولنے کی جرأت نہیں کرتا ہے۔ تیجسوی، جو بہار قانون ساز اسمبلی میں اپوزیشن کے لیڈر بھی ہیں، نے زور دے کر کہا کہ ریاست کے سلگتے ہوئے مسائل پر وزیر اعلیٰ نتیش کمار اور ان کے دو نائب وزرا اعلیٰ کی خاموشی مجرمانہ ہے۔ آر جے ڈی لیڈر نے عوام پر بھی طنز کیا اور کہا کہ اگر اس طرح کے واقعات پر نام نہاد دانشور اور انصاف پسند لوگوں کا خون نہیں کھولتا ہے تو انہیں معزز انسان نہیں سمجھا جائے گا۔ تیجسوی نے جس واقعہ کا حوالہ دیا وہ بودھ گیا میں پیش آیا، جہاں جمعرات کو بہار اسپیشل آرمڈ پولیس میں ہوم گارڈز کے لیے بھرتی مہم چل رہی تھی۔ ایک 26 سالہ خاتون امیدوار جسمانی ٹیسٹ کے دوران بے ہوش ہو گئی اور اسے ایک ایمبولینس میں گیا کے انوگرہ نارائن مگدھ میڈیکل کالج اینڈ ہسپتال بھیج دیا گیا۔ خاتون نے بعد میں الزام لگایا کہ اسپتال لے جاتے وقت ایمبولینس میں تین سے چار لوگوں نے اس کے ساتھ اجتماعی عصمت دری کی اور اسے ہوش آنے کے بعد اس کا احساس ہوا۔ گیا کے سینئر سپرنٹنڈنٹ آف پولیس (ایس ایس پی) آنند کمار کے مطابق اس واقعے کے سلسلے میں ایمبولینس ڈرائیور ونے کمار اور ٹیکنیشن اجیت کمار سمیت دو لوگوں کو گرفتار کیا گیا ہے۔ ایف آئی آر درج کر لی گئی ہے، مزید تحقیقات جاری ہیں۔ہندوستھان سماچار

ہندوستان سماچار / Mohammad Afzal Hassan