نئی دہلی/حیدرآباد، یکم جولائی (ہ س)۔ بھارتیہ جنتا پارٹی کی تلنگانہ ریاستی اکائی کے نو مقرر کردہ صدر این رام چندر راو نے ریاست میں سیاسی تبدیلی پر زور دیا ہے۔ انہوں نے پارٹی میں اجتماعی قیادت کو فروغ دینے کی بات کی ہے۔ انہوں نے پارٹی کے لیے اپنے وژن، اپنی قیادت کے انداز اور آئندہ اسمبلی انتخابات کے لیے حکمت عملی کے بارے میں بھی تفصیل سے بات کی۔

صدر کے عہدے پر بلا مقابلہ منتخب ہونے کے بعد این رام چندر راو نے ہندوستھان سماچار سے بات کی۔ انہوں نے 2028 کے اسمبلی انتخابات تک ریاست میں سیاسی تبدیلی کا وعدہ کیا ہے۔ انہوں نے کہا کہ ریاست میں کسی بھی وقت بلدیاتی انتخابات ہونے والے ہیں۔ یہ ہمارا پہلا چیلنج ہے اور ہمیں تنظیمی اور انتخابی طور پر اس کا مقابلہ کرنے کے لیے تیار رہنا چاہیے۔

انہوں نے کہا کہ اس سے آگے میری توجہ نچلی سطح یعنی بوتھ لیول سے پارٹی کی تعمیر نو پر ہے۔ ہمارا مشن یہ یقینی بنانا ہے کہ بی جے پی 2028 تک تلنگانہ میں برسراقتدار آئے۔ لوگ موجودہ حکومت سے مایوس ہیں۔ ریاست میں حکومت مخالف لہر ہے اور بی جے پی ایک فطری متبادل کے طور پر ابھر رہی ہے۔ ہمارا کام لوگوں کو منظم کرنا، ان میں جوش و خروش پیدا کرنا اور اس عوامی جذبات کو انتخابی حقیقت میں بدلنا ہے۔

بی جے پی صدر نے کہا کہ وہ اجتماعی قیادت کے ذریعے کام کرنا چاہتے ہیں۔ یہ پارٹی اور پارٹی لیڈر دونوں کے لیے اہم ہے۔ کچھ لوگ”نئے بمقابلہ پرانے “ اراکین کے ارد گرد جو بیانیہ بنا رہے ہیں، وہ اسے ختم کرنا چاہتے ہیں۔

انہوں نے کہا کہ تحریک ان کی سیاسی حکمت عملی کا حصہ ہوگی۔ موجودہ حکومت کی طرف سے بہت سی عوام دشمن پالیسیاں نافذ کی جا رہی ہیں۔ بی جے پی انہیں جوش وخروش کے ساتھ اٹھائے گی۔ عوام کے ساتھ کھڑے ہونے کے لیے بھرپور تحریک چلائی جائے گی۔ وہ سامنے سے ہر تحریک کی قیادت کریں گے۔ جب عوام کو تکلیف ہو تو بی جے پی خاموش تماشائی نہیں بن سکتی۔

این رام چندر راو نے اتحاد، زمینیسطح پر متحرک ہونے اور تنظیمی طاقت پر مبنی ایک واضح روڈ میپ تیار کرنے کے بارے میں بھی بات کی۔ انہوں نے کہا کہ ہم ایک پارٹی، ایک مشن ہیں، 2028 میں بی جے پی کو اقتدار میں لانا بوتھ سطح سے شروع ہوتا ہے۔ بلدیاتی انتخابات ہمارے سامنے ہیں۔ پہلی بار بی جے پی اتنے بڑے پیمانے پر الیکشن لڑے گی۔ پنچایت سطح سے پارلیمنٹ تک۔ وارڈ ممبران سے لے کر جے پی ٹی سی تک، میونسپل کونسلوں سے لے کر کارپوریشنوں تک، یہ ایک بڑا موقع اور ایک بڑا چیلنج دونوں ہے۔

قابل ذکر ہے کہ این رام چندر راو طالب علمی کے دوران ہی اکھل بھارتیہ ودیارتھی پریشد سے وابستہ ہوئے تھے۔ انہوں نے بھارتیہ جنتا یووا مورچہ کے سکریٹری، اسٹیٹ لیگل سیل کے کنوینر، نیشنل لیگل سیل کے رکن، غیر منقسم آندھرا پردیش اور بعد میں تلنگانہ کے جنرل سکریٹری اور پارٹی ترجمان کے طور پر خدمات انجام دیں۔

ہندوستھان سماچار

ہندوستان سماچار / محمد شہزاد