ہندوستان اے اور انگلینڈ لائنز کے درمیان ہائی اسکورنگ مقابلہ ڈرا، چوتھے روز بھی بلے بازوں کا جلوہ برقرار

۔ ہندوستان اے کی دوسری اننگز میں تمام ٹاپ 6 بلے بازوں نے نصف سنچریاں بنائیں

نئی دہلی، 3 جون (ہ س)۔ کینٹربری میں ہندوستان اے اور انگلینڈ لائنز کے درمیان چار روزہ پریکٹس میچ ڈرا ہو گیا۔ پیر کو مسلسل چوتھے دن میچ میں بلے بازوں کا دبدبہ رہا، دونوں ٹیموں کے ٹاپ آرڈر نے رنوں کی بارش کر دی۔ میچ کے چوتھے دن کا آغاز انگلینڈ لائنز کی پہلی اننگز سے ہوا جس میں ٹیم نے ہندوستان اے کے 557 رنوں کے جواب میں 587 رن بنائے۔ آخری وکٹ کے لیے 49 رنوں کی شراکت ہوئی جس نے ٹیم کو 30 رن کی برتری دلائی۔

دوسری اننگز میں ہندوستان اے کی اوپننگ جوڑی نے تیز شروعات کی۔ یشسوی جیسوال اور ابھیمنیو ایشورن دونوں نے پہلی اننگز کی ناکامی کو پیچھے چھوڑتے ہوئے نصف سنچریاں بنائیں۔ جیسوال نے صرف 60 گیندوں میں 64 رن بنائے، جن میں سے 80 فیصد باونڈریز سے آئے۔ دونوں نے مل کر 123 رنوں کی اوپننگ پارٹنرشپ کی، وہ بھی تیز رن ریٹ پر۔

جیسوال کے آوٹ ہونے کے بعد ایشورن قدرے محتاط تھے لیکن جیسے ہی دھرو جوریل کریز پر آئے، رن ریٹ میں پھر تیزی آگئی۔ پہلی اننگز میں 94 رن بنانے کے بعد جوریل نے دوسری اننگز میں بھی 51 گیندوں میں نصف سنچری بنائی۔ اس کے بعد نتیش ریڈی نے بھی جارحانہ بلے بازی کی۔ پہلی اننگز میں صرف 7 رن پر آوٹ ہونے والے ریڈی نے دوسری اننگز میں 43 گیندوں میں 51 رن بنائے جس میں ڈین موسلی سے ایک اوور میں 18 رن لئے۔

میچ کی خاص بات یہ رہی کہ ہندوستان اے کے تمام ٹاپ 6 بلے بازوں نے دونوں اننگز میں کم از کم ایک نصف سنچری اسکور کی۔ اس سے ٹیم کا بلے بازی آرڈر مکمل طور پر متوازن اور مضبوط نظر آیا۔

مختصر اسکور کارڈ:

ہندوستان اے: 557 (کرون نائر 204، دھرو جریل 94، سرفراز خان 92؛ جوش ہل 3/72، زمان اختر 3/73)اور 241/2 (ابھیمنیو ایشورن 68، یشسوی جیسوال 64، دھرو جوریل 54*، نتیش ریڈی 52*)

انگلینڈ لائنز: 587 (ٹام ہینس 175، ڈین موسلی 113، میکس ہولڈن 101، مکیش کمار 3/92)

نتیجہ: میچ ڈرا رہا۔

ہندوستھان سماچار

---------------

ہندوستان سماچار / انظر حسن