جموں, 29 جون (ہ س)سول ایکشن پروگرام کے تحت ضلع پولیس ڈوڈہ کی جانب سے گورنمنٹ ہائی اسکول گھٹ میں ضلع سطحی شہداء میموریل کرکٹ ٹورنامنٹ کا کامیاب انعقاد کیا گیا۔ 20 جون سے شروع ہونے والا یہ ٹورنامنٹ نہ صرف شہداء کو خراج عقیدت پیش کرنے کے لیے تھا بلکہ نوجوانوں کو منشیات جیسی برائیوں سے دور رکھنے اور صحت مند سرگرمیوں کی طرف راغب کرنے کی ایک مثبت کوشش بھی تھی۔

فائنل میچ میں شائننگ کرکٹ کلب ڈوڈہ نے اے این کے وارئیرز بھدرواہ کا 174 رن کا ہدف 14 اوور میں حاصل کر کے شکست دی۔ ٹورنامنٹ کے اختتامی پروگرام میں ایس ایس پی ڈوڈہ سندیپ مہتا مہمان خصوصی تھے، جنہوں نے نوجوانوں کی کارکردگی کو سراہتے ہوئے کہا کہ کھیل کود سے نہ صرف جسمانی و ذہنی صحت بہتر ہوتی ہے بلکہ یہ منشیات سے بچاؤ کا بھی مؤثر ذریعہ ہے۔

فاتح ٹیم کے کھلاڑیوں نے مطالبہ کیا کہ دیہی علاقوں میں بھی ایسے ٹورنامنٹ منعقد کیے جائیں جہاں اب کھیلوں کے میدان اور اسٹیڈیم دستیاب ہیں۔ ان کا کہنا تھا کہ کرکٹ جیسے مقابلے نوجوانوں کو منشیات سے دور رکھنے کے ساتھ ساتھ پولیس اور دیگر فورسز میں شامل ہونے کی ترغیب بھی دیتے ہیں۔

ریحان فضل کو بہترین آل راؤنڈر قرار دیا گیا، جب کہ عاقب زرگر کو بہترین بیٹر اور عارف راتھر کو بہترین باؤلر کا اعزاز ملا۔

ضلع پولیس ڈوڈہ نے نوجوانوں کی رہنمائی اور منشیات کے خلاف جدوجہد کے عزم کو دہراتے ہوئے کہا کہ ایسے اقدامات مستقبل میں بھی جاری رہیں گے۔

ہندوستھان سماچار

ہندوستان سماچار / محمد اصغر