ممبئی، 29 جون (ہ س)۔ ممبئی میں مساجد نے لاؤڈ اسپیکر پر پولیس کی سختی

کے بعد اذان کی ادائیگی کے لیے ڈیجیٹل حل اختیار کر لیا ہے۔ ماہم کی جامع مسجد سمیت

کم از کم چھ مساجد نے ’آن لائن اذان‘ نامی موبائل ایپ کو اپنا لیا ہے، جس کے ذریعے

نمازی اذان کو حقیقی وقت میں اپنے موبائل فون پر سن سکتے ہیں۔ فہد خلیل پٹھان، جو

ماہم جمعہ مسجد کے منیجنگ ٹرسٹی ہیں، نے بتایا کہ پولیس کے انتباہ کے بعد مسجد کا

ساؤنڈ سسٹم عارضی طور پر بند کر دیا گیا تھا، جس کے بعد نمازیوں کو اذان سے جوڑے

رکھنے کے لیے ایپ کا سہارا لیا گیا۔

تمل ناڈو میں تیار کردہ اس ایپ کو آئی

ٹی ماہرین کی ٹیم نے تخلیق کیا ہے اور یہ اینڈرائیڈ و آئی او ایس پلیٹ فارمز پر

دستیاب ہے۔ اذان دینے کے وقت ایپ لائیو آڈیو اسٹریم کے ذریعے مسجد کی اذان کو نشر

کرتی ہے۔ پٹھان کے مطابق، بزرگ اور قریب رہنے والے افراد جو اب روایتی لاؤڈ اسپیکر

سے اذان نہیں سن سکتے، وہ اس ایپ کے ذریعے براہِ راست اذان سن سکتے ہیں۔ ایپ نہ

صرف اذان نشر کرتی ہے بلکہ نماز کے اوقات سے بھی مطلع کرتی ہے اور اسمارٹ واچ جیسی

خودکار خصوصیات رکھتی ہے۔

صرف تین دن میں ماہم مسجد کے اطراف کے

500 سے زائد افراد نے ایپ پر رجسٹریشن کر لیا ہے۔ ایپ میں صرف علاقہ اور قریبی

مسجد منتخب کرنے پر اذان کا نوٹیفکیشن موصول ہوتا ہے۔ فہد پٹھان نے کہا کہ ہم نے

تصادم کی راہ نہیں اپنائی، بلکہ جدید ٹیکنالوجی کے ذریعے عبادت گزاروں کو اذان سے مربوط

رکھنے کی کوشش کی ہے۔

بامبےہائی کورٹ نے اگرچہ لاؤڈ اسپیکر

پر مکمل پابندی عائد نہیں کی، لیکن دن میں 55 ڈیسیبل اور رات میں 45 ڈیسیبل کی حد

مقرر کی ہے، جس کے پیش نظر ہم نے ازخود لاؤڈ اسپیکر بند کر دیے ہیں۔ ایپ بنانے والی

کمپنی کے محمد علی کے مطابق، تمل ناڈو کی 250 مساجد اس نظام سے جڑ چکی ہیں، اور

رجسٹریشن کے لیے مسجد کے پتے، اذان دینے والے کا آدھار کارڈ اور فارم لازمی ہیں۔

ممبئی کانگریس کے رہنما آصف فاروقی نے

اس اقدام کو خوش آئند قرار دیا اور کہا کہ عبادت اصل ہے، ذریعہ کچھ بھی ہو۔ بی جے

پی رہنما کریٹ سومیا کا دعویٰ ہے کہ ان کی مہم کے نتیجے میں ممبئی میں 1500 لاؤڈ

اسپیکر اتارے جا چکے ہیں، جن میں سے بیشتر بغیر اجازت استعمال ہو رہے تھے۔

ہندوستھان سماچار

--------------------

ہندوستان سماچار / خان این اے