نئی دہلی، 22 جون (ہ س)۔

دہلی کے وزیر صحت اور وکاسپوری اسمبلی حلقہ کے ایم ایل اے پنکج کمار سنگھ نے اپنے علاقے میں گرین مہم کو نئی تحریک دی ہے۔ 'ماں کے نام پر ایک درخت' مہم کے تحت ہفتہ کو پورے وکاسپوری اسمبلی حلقہ میں 501 پودے لگائے گئے۔ وزیر صحت نے یہ معلومات سوشل میڈیا سائٹ ایکس پر شیئر کی ہے۔

وزیر صحت نے اپنی پوسٹ میں کہا، یہ صرف درخت نہیں ہیں، بلکہ ہر ماں کے احسانات کی علامت ہیں اور ماحول کے تئیں ہماری ذمہ داری ہے۔ ہمارا عزم ہے کہ اس پہل کو مزید وسیع کریں اور وکاسپوری کو مزید سرسبز بنائیں۔ آپ سب سے درخواست ہے کہ اس مہم میں حصہ لیں اور ماں کے نام پر کم از کم ایک درخت لگائیں۔

قابل ذکر ہے کہ 'ایک پیڑ ماں کے نام' مہم 2.0 کے تحت حکومت ہند کا 10 کروڑ پودے لگانے کا ہدف ہے۔ اس کے ساتھ ساتھ دہلی حکومت نے 2025-26 میں 3 لاکھ 70 ہزار پودے لگانے کا ہدف بھی مقرر کیا ہے جس میں 1 لاکھ پودے، 2 لاکھ جھاڑی اور 70 ہزار بانس کے پودے اسکولوں، مین روڈ کے آس پاس اور بڑے پارکوں وغیرہ میں لگائے جائیں گے۔ پلاسٹک سے پاک پودے (مٹی کے برتن یا بوریاں)، کیمیائی کھادوں سے پرہیز اور پہلے لگائے گئے پودوں کی دیکھ بھال کو یقینی بنانا بھی اس مہم کا حصہ ہے۔ یہ مہم 3 ماہ جون، جولائی اور اگست میں چلائی جائے گی۔

ہندوستھان سماچار

ہندوستان سماچار / عطاءاللہ