آرین کے ہیلی کاپٹر نے صبح 5.21 بجے کیدارناتھ سے ٹیک آف کیا۔ ہیلی کاپٹر کے حادثے کی وجہ خراب موسم بتائی جا رہی ہے۔
رودرپریاگ، 15 جون (ہ س)۔ کیدارناتھ سے گپت کاشی واپس آنے والا ایک ہیلی کاپٹر گوری کنڈ کے اوپری حصے میں واقع گوری مائی کھڑک میں گر کر تباہ ہوگیا۔ حادثے میں 23 ماہ کی بچی سمیت 7 افراد کی موت ہو گئی۔ ہیلی کاپٹر کے حادثے کی وجہ خراب موسم سمجھا جارہا ہے۔ این ڈی آر ایف، ایس ڈی آر ایف، ڈی ڈی آر ایف اور پولیس ٹیموں نے موقع پر پہنچ کر لاشوں کو برآمد کیا۔
اتوار کی صبح 5.21 بجے آرین ہیلی کمپنی کے ہیلی کاپٹر نے کیدارناتھ ہیلی پیڈ سے چھ مسافروں کے ساتھ گپت کاشی کے لیے اڑان بھری۔ تقریباً 4 منٹ بعد یہ ہیلی کاپٹر گوری کنڈ کے بالکل اوپر واقع گور مائی کھڑک میں خراب موسم کی وجہ سے ایک درخت سے ٹکرا گیا۔ حادثے میں پائلٹ سمیت ہیلی کاپٹر میں سوار تمام 6 مسافر موقع پر ہی دم توڑ گئے۔
حادثے میں مرنے والوں میں راج کمار سریش جیسوال (41) ساکن نندیپیرا روڈ سان مندر مہاراشٹرا، شردھا سریش جیسوال (35)، راجکمار سریش جیسوال کی بیٹی کاشی (23 ماہ)، وکرم سنگھ راوت (46) ساکن رانسی گاؤں پی او اوکھیمٹھ رودرپریاگ،پائلٹ کیپٹن راجیو راجستھان، ونود دیوی (66) بجنور یوپی اور تسٹی سنگھ (19) شامل ہیں۔
این ڈی آر ایف، ایس ڈی آر ایف، ڈی ڈی آر ایف، پولیس اہلکار موقع پر پہنچ گئے اور بچاؤ شروع کیا۔ تمام لاشیں نکال لی گئیں۔ ہیلی کاپٹر کا ملبہ جائے وقوعہ پر پڑا ہے جو بری طرح جل گیا ہے۔
کیدارناتھ یاترا ہیلی کاپٹر سروس کے نوڈل آفیسر راہل چوبے نے بتایا کہ خراب موسم کی وجہ سے ہیلی کاپٹر اچانک ایک درخت سے ٹکرا گیا، جس کی وجہ سے یہ حادثہ ہوا۔ تمام اہل خانہ کو واقعہ کی اطلاع دے دی گئی ہے۔
اس دوران ضلع مجسٹریٹ ڈاکٹر سوربھ گہروار نے کہا کہ حادثے میں ہلاک ہونے والے افراد کی لاشوں کا پنچنامہ بھر کر مزید کارروائی کی جا رہی ہے۔
آپ کو بتاتے چلیں کہ کیدارناتھ یاترا میں اس سال یہ تیسرا حادثہ ہے۔ اس سے پہلے 17 مئی کو ایمس رشیکیش کی ہیلی ایمبولینس سنجیونی کی کیدارناتھ کے قریب ہنگامی لینڈنگ ہوئی تھی۔ اس دوران ہیلی کاپٹر کے ٹیل روٹر کو بھی نقصان پہنچا۔ 7 جون کو بڈاسو سے کیدارناتھ کے لیے ٹیک آف کرتے وقت کرسٹل کمپنی کے ہیلی کاپٹر کی رودرپریاگ-گوری کنڈ ہائی وے پر ہنگامی لینڈنگ ہوئی۔ اس دوران ہیلی کاپٹر میں پائلٹ سمیت چھ افراد سوار تھے۔
---------------
ہندوستان سماچار / عبدالسلام صدیقی
