گوہاٹی، یکم جون (ہ س)۔ آسام میں طوفانی بارش سے سیلاب اور لینڈ سلائیڈنگ کی سنگین صورتحال کے درمیان مرکزی وزیر داخلہ امت شاہ نے ریاست کو مرکزی حکومت کی طرف سے ہر ممکن مدد کی یقین دہانی کرائی ہے۔ وزیر اعلیٰ ڈاکٹر ہیمنت بسوا سرما نے اتوار کو کہا کہ وزیر داخلہ نے انہیں فون کیا اور صورتحال کے بارے میں دریافت کیا اور تمام ضروری مدد فراہم کرنے کا وعدہ کیا۔

وزیر اعلیٰ شرما نے سوشل میڈیا پلیٹ فارم 'ایکس' پر لکھا، وزیر داخلہ امت شاہ نے کچھ دیر پہلے مجھے فون کیا اور آسام میں سیلاب کی صورتحال کے بارے میں دریافت کیا اور ہر ممکن مدد کا یقین دلایا۔ میں نے انہیں اب تک کی گئی تیاریوں کے بارے میں آگاہ کیا۔ ہم ان کے حساس رویہ اور تعاون کے شکر گزار ہیں۔

ریاست کے 12 اضلاع میں سیلاب اور لینڈ سلائیڈنگ کی وجہ سے صورتحال بہت خراب ہے۔ اب تک 58 ہزار سے زائد افراد متاثر ہو چکے ہیں۔ یکم جون کو ڈبرو گڑھ میں برہم پترا ندی خطرے کے نشان کو پار کر گئی جس سے صورتحال مزید سنگین ہو گئی ہے۔

آسام اسٹیٹ ڈیزاسٹر منیجمنٹ اتھارٹی (اے ایس ڈی ایم اے) کے مطابق اب تک آٹھ افراد کی موت ہوچکی ہے اور 175 گاؤں متاثر ہوئے ہیں۔ ان میں سے 3 سیلاب اور 5 لینڈ سلائیڈنگ میں ہلاک ہوئے۔ یہ اموات گولا گھاٹ، لکھیم پور اور کامروپ (میٹرو) اضلاع میں ہوئی ہیں۔ گولا گھاٹ اور گوہاٹی میں بھی بچے جان سے ہاتھ دھو بیٹھے ہیں۔

سات ہزار سے زیادہ لوگ ریلیف کیمپوں میں رہ رہے ہیں۔ دھیماجی، جنوبی سلمارا، لکھیم پور، ڈبرو گڑھ، گولاگھاٹ اور کاربی انگلونگ کے 175 گاؤں متاثر ہوئے ہیں۔ انتظامیہ نے 16 ریلیف کیمپ اور ڈسٹری بیوشن سینٹرز قائم کیے ہیں جہاں 7000 سے زائد افراد نے پناہ لی ہے۔

فصلوں اور مویشیوں کو بھاری نقصان پہنچا ہے۔ تقریباً 791 ہیکٹر زرعی اراضی زیر آب آگئی ہے۔ تقریباً 76 ہزار جانور متاثر ہوئے ہیں اور 194 جانوروں کے بہہ جانے کی اطلاع ہے۔ سڑکوں اور دیگر بنیادی ڈھانچے کو بھی بڑے پیمانے پر نقصان پہنچا ہے۔

22 سڑکیں، ایک پل، کئی پشتے اور آبپاشی کی نہروں کو نقصان پہنچا ہے۔ اسکول اور آنگن واڑی سینٹر کی عمارتیں بھی متاثر ہوئی ہیں۔ گوہاٹی اور دیگر اضلاع میں شہری سیلاب کی وجہ سے تقریباً 10 ہزار لوگ متاثر ہوئے ہیں۔ ایس ڈی آر ایف، این ڈی آر ایف، فائر سروس اور مقامی انتظامیہ کی ٹیمیں راحت اور بچاؤ کاموں میں مصروف ہیں۔

محکمہ موسمیات نے مزید بارش کی وارننگ دی ہے، اس لیے ریاستی انتظامیہ الرٹ ہے اور نقصان کو کم سے کم کرنے کی کوششیں جاری ہیں۔

ہندوستھان سماچار

---------------

ہندوستان سماچار / عبدالواحد