کوئٹہ میں پاکستانی فوج پر سلسلے وار حملے، فرنٹیئر کور ہیڈ کوارٹرز سمیت کئی مقامات نشانے پر

اسلام آباد/کوئٹہ، 9 مئی (ہ س)۔ پاکستان کے صوبہ بلوچستان کے دارالحکومت کوئٹہ میں جمعرات کی دیر رات پاکستانی فوج کے خلاف منظم اور سلسلہ وار حملے ہوئے۔ مقامی ذرائع اور ابتدائی میڈیا رپورٹس کے مطابق ان حملوں میں متعدد فوجی تنصیبات کو نشانہ بنایا گیا جن میں فرنٹیئر کور ہیڈ کوارٹر، سیکورٹی چیک پوسٹ اور ہزارہ ٹاون میں آرمی پوسٹ شامل ہیں۔

مسلح افراد نے کوئٹہ میں فرنٹیئر کور ہیڈ کوارٹر کو نشانہ بنایا۔ حملے سے پہلے کئی زور دار دھماکوں کی آوازیں آئیں، جس کے بعد بھاری فائرنگ کی آوازیں آئیں۔ فوج نے علاقے کو گھیرے میں لے لیا ہے اور جوابی کارروائی کی جا رہی ہے۔ جبکہ کوئٹہ میں قمبرانی روڈ پر واقع محفوظ خان چیک پوسٹ پر بھی کم از کم دو دھماکے ہوئے۔ ابھی تک کسی تنظیم نے اس حملے کی ذمہ داری قبول نہیں کی ہے تاہم یہ علاقہ ماضی میں بھی دہشت گردانہ کارروائیوں کے لیے حساس رہا ہے۔

وہیں مسلح حملہ آوروں نے کیرانی روڈ پر واقع ہزارہ ٹاؤن میں آرمی پوسٹ پر بھی حملہ کیا۔ پورے علاقے میں دھماکوں اور فائرنگ کی آوازیں گونج اٹھیں۔ علاقے کے مکینوں میں خوف و ہراس کا ماحول ہے۔

ان حملوں کے بعد بلوچستان حکومت نے کوئٹہ میں ہائی الرٹ کا اعلان کر دیا ہے۔ فوج اور نیم فوجی دستوں کو حملہ آوروں کو پکڑنے کے لیے کومبنگ آپریشن کرنے کی ہدایت دی گئی ہے۔ شہر کے کئی علاقوں میں انٹرنیٹ خدمات کو عارضی طور پر معطل کر دیا گیا ہے اور حساس علاقوں میں کرفیو جیسی پابندیاں عائد کر دی گئی ہیں۔

ہندوستھان سماچار

---------------

ہندوستان سماچار / انظر حسن