نئی دہلی، 9 مئی (ہ س)۔ انڈین پریمیئر لیگ (آئی پی ایل 2025) ملتوی کر دی گئی ہے۔ بورڈ آف کنٹرول فار کرکٹ ان انڈیا (بی سی سی آئی) نے یہ فیصلہ ہند-پاک کے درمیان کشیدگی اور سرحد پر جنگ جیسی صورتحال کے پیش نظر کیا ہے۔ باضابطہ اعلان جلد متوقع ہے۔
یہ فیصلہ آئی پی ایل نے پنجاب کنگز اور دہلی کیپٹلس کے درمیان جمعرات کو ہونے والے میچ کو پہلی اننگ کے وسط میں ختم کرنے کے فیصلے کے بعد کیا ہے۔ دھرم شالہ اور آس پاس کے علاقوں کے ہوائی اڈے بند ہونے کے بعد، پنجاب اور دہلی کے کھلاڑی اور معاون عملہ آئی پی ایل کے زیر اہتمام ایک خصوصی ٹرین کے ذریعے جمعہ کی صبح دہلی پہنچے۔
آئی پی ایل 2025 میں اب تک 58 میچ کھیلے جا چکے ہیں جن میں دھرم شالہ میں منسوخ ہونے والا میچ بھی شامل ہے۔ گروپ مرحلے میں کھیلے جانے والے 12 میچ باقی ہیں، جس میں لکھنؤ (2)، حیدرآباد، احمد آباد (3)، دہلی، چنئی، بنگلور (2)، ممبئی، جے پور، اس کے بعد حیدرآباد اور کولکاتا میں پلے آف شامل ہیں۔ اب یہ تمام میچ غیر معینہ مدت کے لیے ملتوی کر دیے گئے ہیں۔
آئی پی ایل کے چیئرمین ارون دھومل نے پہلے کہا تھا کہ ہمارے لیے قومی مفاد سب سے اہم ہے۔ مزید میچ کے انعقاد کا کوئی بھی فیصلہ صورتحال کے نارمل ہونے اور حکومت سے بات چیت کے بعد کیا جائے گا۔ دھومل نے کہا، ہم صورتحال کا جائزہ لے رہے ہیں، ہمیں ابھی تک حکومت کی طرف سے کوئی ہدایات نہیں ملی ہیں۔ یہ بورڈ کا اپنا فیصلہ ہے۔ ہم کوئی بھی فیصلہ تمام منطقی غور و فکر کے بعد کرتے ہیں اور سب کے مفادات کو مدنظر رکھتے ہوئے کرتے ہیں۔
---------------
ہندوستان سماچار / عبدالسلام صدیقی
