ماسکو، 08 مئی (ہ س)۔ دوسری جنگ عظیم میں سوویت یونین کی جرمنی پر فتح کا جشن منانے کے لیے پورا روس تیار ہے۔ اس یوم فتح کی 80 ویں سالگرہ کے موقع پر 29 ممالک کے سربراہان 9 مئی کو ماسکو کے ریڈ اسکوائر پر ہونے والی وکٹری پریڈ میں حصہ لیں گے۔ چینی صدر شی جن پنگ پریڈ کے مہمان خصوصی ہوں گے۔ شی صدر ولادیمیر پوتن کی دعوت پر کریملن پہنچے ہیں۔
روسی خبر رساں ایجنسی تاس کے مطابق روس اور چین کے سربراہان مملکت کے درمیان آمنے سامنے ملاقات ہوگی۔ اس کے بعد دونوں ممالک کے وفود کے درمیان تفصیلی بات چیت متوقع ہے۔ کریملن پریس سروس کے مطابق سربراہان مملکت یوکرین کے تنازعہ اور روس امریکہ تعلقات سمیت دیگر اہم امور پر بات کریں گے۔ رواں سال کے آغاز سے دونوں رہنماو¿ں کے درمیان یہ تیسری بات چیت ہوگی۔ دونوں نے جنوری میں ویڈیو کانفرنس میٹنگ کی اور فروری کے آخر میں فون پر بات کی۔
مصری صدر عبدالفتاح السیسی بھی یوم فتح کی تقریبات میں شرکت کے لیے آج ماسکو روانہ ہو گئے۔ ان کے دفتر نے ایک بیان میں یہ اطلاع دی۔ الیووم السبیع نیوز ویب سائٹ کے مطابق مصری صدر عبدالفتاح السیسی 9 مئی کو یوم فتح کی تقریبات میں شرکت کے لیے یونانی دارالحکومت ایتھنز سے ماسکو کے دورے پر روانہ ہوئے۔السیسی کا یہ دورہ روسی صدر پوتن کی دعوت پر ہو رہا ہے۔
تاس کے مطابق، ماسکو وکٹری پریڈ میں 29 ممالک کے سربراہان مملکت کا استقبال کرے گا۔ وینزویلا کے صدر نکولس مادورو، چین کے رہنما شی جن پنگ اور ویتنام کی کمیونسٹ پارٹی کے جنرل سکریٹری ٹو لام کے علاوہ آذربائیجان، آرمینیا، بیلاروس، قازقستان، کرغزستان، تاجکستان، ترکمانستان، ازبکستان، ابخازیہ، بوسنیا، ہرزیگووینا، برازیل، برکینا فاسو، وینزویلا، ویتنام ، گنی بساؤ، زمبابوے، کانگو، کیوبا، لاؤس، منگولیا، میانمار، فلسطین، سربیا، سلوواکیہ، استوائی گنی، ایتھوپیا اور جنوبی اوسیشیا موجود ہوں گے۔
روسی صدر کے معاون یوری اشاکوف نے کہا کہ ہندوستان، نکاراگوا اور جنوبی افریقہ کو نمایاں طور پر اعلیٰ سطح پر نمائندگی دی جائے گی۔ پوتن ستمبر میں دوسری عالمی جنگ کے خاتمے کی 80 ویں سالگرہ کی تقریبات کے لیے بیجنگ کا دورہ کر سکتے ہیں۔ روس کے دارالحکومت میں 29 ممالک کے رہنماو¿ں کی آمد عالمی سطح پر روس کے بڑھتے ہوئے اثر و رسوخ کی عکاسی کرتی ہے۔ پوتن جمعہ کو چین، برازیل اور دیگر سربراہان مملکت کے لیے تقریبات کی میزبانی کریں گے۔
ہندوستھان سماچار
ہندوستان سماچار / محمد شہزاد
