جموں, 4 مئی (ہ س)۔

خطے کی سلامتی کو مدنظر رکھتے ہوئے جموں و کشمیر پولیس کے اعلیٰ افسران نے جموں-پٹھانکوٹ قومی شاہراہ پر سیکورٹی انتظامات کا ہمہ جہت جائزہ لیا۔ انسپکٹر جنرل آف پولیس (جموں زون) بھیم سین توتی اور ڈی آئی جی جموں-سانبہ-کٹھوعہ رینج شیو کمار شرما نے شاہراہ کے مختلف مقامات اور حساس تنصیبات کا معائنہ کیا۔اس موقع پر ایس ایس پی کٹھوعہ شوبھت سکسینہ، ایس ایس پی جموں جوگیندر سنگھ اور ایس ایس پی سانبہ وریندر سنگھ منہاس بھی ہمراہ تھے۔ معائنے کے دوران گنگیال، سانبہ، کٹھوعہ، لکھن پور، بسنت پور، مہان پور، رام پور، مجالتہ، منوال، جندرا اور دومیل جیسے کلیدی مقامات کا دورہ کیا گیا۔

آئی جی پی نے موجودہ حفاظتی انتظامات کا باریک بینی سے مشاہدہ کرتے ہوئے ممکنہ سیکورٹی خلا کی نشاندہی کی اور افسران کو ہدایت دی کہ اہم تنصیبات، خاص طور پر پیٹرول پمپس، بجلی گھر اور مواصلاتی مراکز کی سیکورٹی کو فول پروف بنایا جائے۔انہوں نے کہا کہ قومی شاہراہ کی اسٹریٹجک اہمیت کے پیش نظر گشتی نظام میں اضافہ، مشتبہ گاڑیوں کی چیکنگ، سی سی ٹی وی مانیٹرنگ اور مختلف سیکورٹی ایجنسیوں کے مابین مؤثر رابطہ نہایت ضروری ہے۔

آئی جی پی نے اہلکاروں کی تعداد بڑھانے، ٹیکنالوجی سے لیس نگرانی، اور کمیونٹی پولیسنگ کے فروغ پر بھی زور دیا۔ اس کے علاوہ، فوری ردعمل کے لیے باقاعدہ مشقیں منعقد کرنے کی ہدایت دی تاکہ کسی بھی ہنگامی صورتحال سے بروقت اور مؤثر انداز میں نمٹا جا سکے۔

ہندوستھان سماچار

---------------

ہندوستان سماچار / محمد اصغر