غازی آباد، 10 مئی (ہ س)۔ تھانہ ٹیلاموڑ پولیس نے سول ایئرپورٹ جانے والی سڑک پر ڈیفنس کٹ کے قریب سے تصادم کے دوران ایک بدمعاش کو گرفتار کیا ہے۔ دہلی کے شیواجی گلی پنڈت پارک گونڈلی گاوں کا رہنے والا یہ بدمعاش پولیس کی گولیوں سے زخمی ہو گیا۔ اسے علاج کے لیے اسپتال میں داخل کرایا گیا ہے۔ اس کے قبضے سے ایک پستول، ایک خالی کارتوس، ایک زندہ کارتوس اور ایک مسروقہ موٹرسائیکل برآمد ہوئی۔

اے سی پی ٹیلا موڑ سلونی اگروال نے بتایا کہ جمعہ کی رات ٹیلاموڑ پولیس اسٹیشن سول ایئرپورٹ کی طرف جانے والی سڑک پر ڈیفنس کٹ پر مشکوک افراد/گاڑیوں کی چیکنگ کی جارہی تھی۔ اسی دوران ٹیلاموڑ پولیس نے سکندر پور چوکی سے تیز رفتاری سے آنے والی ایک موٹر سائیکل کو چیکنگ کے لیے رکنے کا اشارہ کیا۔ موٹر سائیکل سوار شخص نے موٹرسائیکل موڑ دی اور ڈیفنس کالونی کی طرف کچی سڑک پر تیزی سے بھاگنے لگا۔ جلد بازی میں موٹر سائیکل بے قابو ہو کر پھسل کر گر گئی۔ پولیس ٹیم کو اپنی طرف آتے دیکھ کر بدمعا نے پولیس پر فائرنگ کردی۔ پولیس ٹیم نے اپنے دفاع اور جوابی کارروائی میں فائرنگ کی جس میں بدمعاش کی ٹانگ میں گولی لگی۔ جس کی وجہ سے بدمعاش گر کر زخمی ہو گیا اور پولیس نے اسے گرفتار کر لیا۔ پوچھ گچھ کے دوران زخمی بدمعاش نے اپنا نام ساگر عرف شاکا ساکن گھوڑی بچھیڑا، دادری تھانہ، گوتم بدھ نگر ضلع بتایا، جو اس وقت شیواجی گلی، پنڈت پارک، گونڈلی گاوں، کرشنا نگر تھانہ، دہلی میں مقیم تھا۔

تفتیش کے دوران بدمعاش نے پولیس کو بتایا کہ برآمد شدہ موٹر سائیکل اس نے ڈیڑھ ماہ قبل تھانہ ٹیلاموڑ کے تحت لونی روڈ پر واقع ڈیمارٹ سے چوری کی تھی۔ ساگر عرف شاکا کے خلاف غازی آباد اور دہلی این سی آر میں چوری، لوٹ، آرمس ایکٹ وغیرہ سے متعلق تقریباً ڈیڑھ درجن معاملے درج ہیں۔

ہندوستھان سماچار

---------------

ہندوستان سماچار / انظر حسن