نئی دہلی، 20 اپریل (ہ س)۔ دہلی کے میئر مہیش کمار کھینچی اور عام آدمی پارٹی کے لیڈر عادل خان نے اتوار کو عام آدمی پارٹی کے دفتر میں ایک پریس کانفرنس سے خطاب کرتے ہوئے مصطفی آباد حادثہ کے ذمہ داروں کے خلاف سخت کارروائی اور متاثرین کو معاوضہ دینے کا مطالبہ کیا۔
میئر مہیش کمار کھینچی نے مصطفی آباد اسمبلی کے علاقے دیال پور میں چار منزلہ عمارت گرنے اور حادثے میں جان کی بازی ہارنے والے افراد پر دکھ کا اظہار کیا۔ انہوں نے کہا کہ حادثہ انتہائی دلخراش تھا اور انہیں متاثرین سے مکمل ہمدردی ہے۔
میئر نے کہا کہ انہوں نے دہلی میونسپل کارپوریشن کمشنر سے حادثے کے ذمہ داروں کے خلاف فوری کارروائی کرنے کو کہا تھا، لیکن ابھی تک کوئی کارروائی نہیں کی گئی ہے۔ یہ انتہائی افسوسناک ہے اور پورا نظام کرپشن میں ملوث ہے۔ انہوں نے کہا کہ وہ دہلی میونسپل کارپوریشن کو خط لکھ رہے ہیں کہ حادثے کے ذمہ دار افسر کے خلاف سخت کارروائی کی جائے اور اسے معطل کیا جائے۔
میئر نے کہا کہ وہ واقعے کے بعد جائے حادثہ پر موجود تھے اور امدادی کارروائیوں کو تیز کرنے کے لیے کہا۔ انہوں نے کہا کہ حادثے کے ذمہ داروں کے خلاف سخت کارروائی کی جائے گی۔
عام آدمی پارٹی کے لیڈر عادل خان نے ابھی تک معاوضے کا اعلان نہ کرنے پر دہلی حکومت کی مذمت کی ہے۔ انہوں نے دہلی کی وزیر اعلیٰ ریکھا گپتا سے مرنے والوں کے لواحقین کو فی کس 10 لاکھ روپے اور زخمیوں کو 5-5 لاکھ روپے معاوضہ دینے کا مطالبہ کیا ہے۔
انہوں نے بتایا کہ عمارت کے ملبے سے 22 افراد کو بچا لیا گیا جن میں سے 11 کی موت ہو گئی اور چھ شدید زخمی ہوئے۔
عادل خان نے کہا کہ دہلی کی بی جے پی حکومت نے 100 کروڑ روپے کا بجٹ پاس کیا ہے، لیکن اس کے پاس غریبوں کو دینے کے لیے پیسے نہیں ہیں۔ اس سے دہلی حکومت کی غریب مخالف سوچ کا پتہ چلتا ہے۔
ہندوستھان سماچار
---------------
ہندوستان سماچار / عبدالواحد
