بریلی، 31 مارچ (ہ س)۔ اتراکھنڈ کے وزیر اعلیٰ پشکر سنگھ دھامی نے کہا کہ یکساں سول کوڈ (یو سی سی) معاشرے میں مساوات اور انصاف کو یقینی بنانے کے لیے ایک آئینی اقدام ہے، جو خواتین کو جائیداد اور وراثت میں مساوی حقوق فراہم کرے گا۔ یہ قانون کسی مذہب یا فرقے کے خلاف نہیں ہے بلکہ برے رسم ورواج کو ختم کرکے ہم آہنگی قائم کرنے کی کوشش ہے۔ وہ پیر کو بریلی کی انورٹس یونیورسٹی میں اتراکھنڈ میں یو سی سی کے نفاذ کے لیے منعقدہ ایک پروقار تقریب سے خطاب کر رہے تھے۔ اس دوران دھامی کو اعزاز سے نوازا گیا۔یو سی سی میں لیو ان ریلیشن شپ کی رجسٹریشن کے حوالے سے پھیلائی جانے والی غلط فہمیوں کو مسترد کرتے ہوئے انہوں نے کہا کہ یہ شق خواتین اور ان کے بچوں کے حقوق کے تحفظ کے لیے ہے۔ اتراکھنڈ سے شروع کی گئی یہ پہل دوسری ریاستوں کو بھی متاثر کرے گی۔ وزیر اعظم نریندر مودی کی قیادت میں لئے گئے تاریخی فیصلوں – دفعہ 370 کی منسوخی، تین طلاق کا خاتمہ، شہریت ترمیمی قانون اور ایودھیا میں شری رام مندر کی تعمیر کا حوالہ دیتے ہوئے، وزیر اعلیٰ نے کہا کہ ان سے تحریک لے کر، اتراکھنڈ میں یو سی سی نافذ کیا گیا ہے۔ اس دوران وزیر اعلیٰ دھامی نے طبی میدان میں بہترین خدمات انجام دینے پر آئی ایم اے ٹیم کو اعزاز سے نوازا۔ اس موقع پر ریاستی وزیر ڈاکٹر ارون کمار، ایم پی چھترپال گنگوار، میئر ڈاکٹر امیش گوتم سمیت کئی معززین موجود تھے۔ہندوستھان سماچار

ہندوستان سماچار / Mohammad Khan