جموں, 18 مارچ (ہ س)کٹرا شہر میں ماتا ویشنو دیوی کے مقدس مقام کے قریب ایک ہوٹل میں شراب نوشی کا معاملہ شدید احتجاج کا سبب بن گیا ہے۔ بالی ووڈ اور سوشل میڈیا انفلوئنسر اوورہان اوتریمانی عرف اووری اور ان کے ساتھیوں کی اس حرکت کے خلاف شیو سینا (یو بی ٹی) جموں و کشمیر یونٹ کے رہنماؤں نے جموں میں سخت احتجاج کرتے ہوئے ان کی فوری گرفتاری اور عوامی معافی کا مطالبہ کیا۔پارٹی کے ریاستی صدر منیش ساہنی کی قیادت میں شیو سینا کارکنان نے مذہبی جذبات کو ٹھیس پہنچانے والے اووری کو گرفتار کرو، جموں میں مکمل شراب بندی نافذ کرو، اور کروڑوں ہندوؤں کی مذہبی آستھا پر حملہ ،جیسے نعرے درج پلے کارڈز کے ساتھ زبردست مظاہرہ کیا۔منیش ساہنی نے شدید غم و غصے کا اظہار کرتے ہوئے کہا کہ اووری نے اپنے آٹھ ساتھیوں کے ساتھ مقدس مذہبی شہر کٹرا کے ایک ہوٹل میں شراب نوشی کر کے ہندو مذہبی جذبات کی کھلی توہین کی ہے، حالانکہ اس مقام پر شراب نوشی پر مکمل پابندی ہے۔ انہوں نے کہا کہ جموں و کشمیر، جو صدیوں سے رشی منیوں اور پیغمبروں کی سرزمین رہی ہے، وہاں مسلسل شراب بندی کا مطالبہ کیا جا رہا ہے، لیکن افسوس کہ جموں جیسے مذہبی شہر کو شراب کے مراکز میں تبدیل کر دیا گیا ہے۔ کٹرا جیسے مقدس مقام پر شراب نوشی کرنا کروڑوں عقیدت مندوں کے مذہبی احساسات کو چیلنج کرنے کے مترادف ہے۔ساہنی نے مزید کہا کہ جو لوگ اورنگزیب کی تاریخ کو لے کر شور مچاتے ہیں، انہیں دیوی ماں ویشنو دیوی کے مقدس مقام کی بے حرمتی کرنے والے اس کل یُگی اورنگزیب اووری کے خلاف بھی اتنی ہی شدت سے آواز اٹھانی چاہیے۔ انہوں نے جموں و کشمیر پولیس سے مطالبہ کیا کہ وہ کسی بھی دباؤ کو خاطر میں نہ لاتے ہوئے سخت قانونی کارروائی کرے۔

ہندوستھان سماچار

ہندوستان سماچار / محمد اصغر