کولکاتہ، 18 اکتوبر (ہ س)۔ کولکاتہ میں ٹیچر بھرتی گھوٹالہ کی تحقیقات میں ایک بڑا موڑ آیا ہے۔ مغربی بنگال کے سابق وزیر پارتھ چٹرجی کے داماد کلیان مئے بھٹاچاریہ نے انفورسمنٹ ڈائریکٹوریٹ (ای ڈی) کے سامنے گواہ بننے کا فیصلہ کیا ہے اور اب خفیہ طور پر اپنا بیان ریکارڈ کرایا ہے۔ اس قدم سے پارتھ چٹرجی کی مشکلات میں مزید اضافہ ہو سکتا ہے۔کچھ عرصہ قبل کلیان مئے بھٹاچاریہ نے عدالت میں درخواست داخل کرکے گواہ بننے کی خواہش ظاہر کی تھی جسے بینک شال میں واقع خصوصی ای ڈی عدالت نے قبول کرلیا۔ اس کے بعد عدالت نے انہیں میٹروپولیٹن اور ڈسٹرکٹ کورٹ کے 20 ویں جوڈیشل مجسٹریٹ کے سامنے خفیہ گواہی دینے کا حکم دیا۔ انہوں نے منگل کو عدالت میں اپنا بیان ریکارڈ کرایا۔ ای ڈی کے مطابق اس معاملے میں پارتھا چٹرجی کے خلاف 26 اور 31 مارچ کو عدالت میں دو اور گواہ پیش ہو سکتے ہیں۔ای ڈی کا الزام ہے کہ پارتھ چٹرجی نے اپنی بیوی، بیٹی اور داماد کو بھی اس بدعنوانی میں ملوث کیا تھا۔ تحقیقات کے دوران یہ بات سامنے آئی کہ مغربی مدنی پور کے پنگلا علاقے کے ایک پرائیویٹ اسکول سے متعلق دستاویزات میں پارتھا چٹرجی کی بیٹی اور داماد کے نام سامنے آئے ہیں۔ امریکہ میں رہتے ہوئے کلیان مے بھٹاچاریہ نے کئی کمپنیاں اور ٹرسٹ چلائے، جن کے ذریعے بڑے پیمانے پر زمین خریدنے کے ثبوت ملے ہیں۔

ای ڈی ذرائع کے مطابق کلیان مے سے جب پوچھ گچھ کی گئی تو اس نے بتایا کہ پارتھا چٹرجی کے دباو¿ کی وجہ سے وہ بدعنوانی میں ملوث ہونے پر مجبور ہوئے تھے۔ تفتیش کے دوران انہیں بیرون ملک سفر کرنے سے بھی روک دیا گیا تھا، اور اب وہ عدالت کی اجازت کے بغیر کولکتہ نہیں چھوڑ سکتے۔ تاہم خفیہ گواہی دینے کے بعد قیاس آرائیاں کی جا رہی ہیں کہ وہ بیرون ملک سفر کی اجازت لے سکتے ہیں۔ماہرین کا خیال ہے کہ کلیان مے بھٹاچاریہ کی گواہی سے پارتھا چٹرجی کے خلاف کیس مضبوط ہو سکتا ہے۔ اگر دیگر گواہان بھی عدالت میں ان کے خلاف بیانات دیں تو تفتیشی اداروں کو ان کے خلاف ٹھوس شواہد اکٹھے کرنے کا موقع ملے گا۔

ہندوستھان سماچار

ہندوستان سماچار / Mohammad Khan