بھوپال، 18 مارچ (ہ س)۔ مدھیہ پردیش اسمبلی کے بجٹ اجلاس کا آج منگل کو چھٹا دن ہے۔ اسمبلی کی کارروائی شروع ہوتے ہی اسپیکر نریندر سنگھ تومر، وزیر خزانہ جگدیش دیوڑا اور اسمبلی کے سابق ڈپٹی اسپیکر راجندر کمار سنگھ نے ایوان میں آنجہانی سابق اراکین اسمبلی وشنو راجوریا، ڈاکٹر دیوچرن سنگھ مدھوکر اور سریندر ناتھ سنگھ کو خراج عقیدت پیش کیا۔

ایوان کے ارکان راجندر کمار سنگھ اور کیلاش وجے ورگیہ نے آنجہانی لیڈر سریندر ناتھ سنگھ کو یاد کرتے ہوئے کہا کہ ان کی میٹنگیں نیو مارکیٹ کے سمتا چوک میں ہوا کرتی تھیں۔ انہوں نے ایک فقیر کی طرح زندگی گزاری اور ایک اعلیٰ ترین رہنما تھے۔ وجے ورگیہ نے کہا کہ شاید ہی کوئی دن ایسا ہو جب انہوں نے کیک نہ کاٹا ہو۔ وہ سب سے زیادہ کیک کاٹنے والے لیڈر تھے۔ رکن اسمبلی بھگوان داس سبنانی نے بھی سریندر ناتھ سنگھ کے ساتھ طلبہ کی سیاست سے بی جے پی تک کے اپنے سیاسی سفر کو یاد کیا۔ اس کے بعد ایوان میں دو منٹ کی خاموشی رکھ کر خراج عقیدت پیش کیا گیا۔ اس کے بعد ایوان کی کارروائی 10 منٹ کے لیے ملتوی کر دی گئی۔

ادھر اسمبلی پہنچے سابق وزیر اعلیٰ اور کانگریس رکن اسمبلی کمل ناتھ نے سی اے جی کی رپورٹ پر کہا کہ ابھی تو آدھا ہی انکشاف ہوا ہے۔ مکمل انکشاف نہیں ہوا ہے۔ انہوں نے کہا کہ آج مدھیہ پردیش میں حالات ایسے ہیں کہ کہیں پولیس پیٹ رہی ہے، تو کہیں پولیس پٹ رہی ہے۔ یہ ریاست کا حال ہے، جہاں پولیس پیٹ بھی رہی ہے، پٹ بھی رہی ہے۔

اسمبلی پہنچے وزیر گووند سنگھ راجپوت نے اپوزیشن لیڈر امنگ سنگھار کے ذریعہ لوک آیکت میں شکایت کرنے پر میڈیا کو اپنے بیان میں کہا کہ انہوں نے اپوزیشن لیڈر امنگ سنگھار کو 20 کروڑ روپے کا نوٹس دیا ہے۔ ان کا چال- چرتر- چہرہ سب جانتے ہیں۔ اس سے پہلے وہ کانگریس کے سینئر لیڈر دگ وجے سنگھ پر بھی کئی الزامات عائد کر چکے ہیں۔

سنگھار بدعنوانی میں گردن تک ڈوبے ہوئے ہیں۔ ان پر شراب مافیا اور ریت مافیا جیسے الزامات ہیں۔ ان سے پوچھا جائے کہ وہ 2 کروڑ روپے کی ڈیفنڈر گاڑی میں کیسے گھوم رہے ہیں۔ ان کی بیوی نے ان پر قتل تک کا الزام عائد کیا ہے۔ سپریم کورٹ میں ایک رٹ بھی دائر کی گئی ہے۔ جس آدمی نے ہماری سپاری لے لی ہو، ہمارے نام کا ٹینڈر لے لیا ہو۔ اگر وہ اب لوک آیکت کے پاس نہیں گئے تو ٹینڈر واپس لے لیا جائے گا۔ اگر ایسے لوگ کانگریس کے اپوزیشن لیڈر بن جائیں تو اگلی بار کانگریس کو 10-8 سیٹیں مل جائیں، یہی بہت ہے۔

دوسری جانب بی جے پی رکن اسمبلی رامیشور شرما نے میڈیا سے بات کرتے ہوئے کہا کہ اورنگ زیب ظالم، قاتل، ڈاکو تھا۔ مسلمانوں کی شناخت اورنگ زیب سے مت بناو۔ مسلمانو خیال رکھو... ملک کو لوٹنے والوں کا ساتھ مت دو...۔ کانگریس کان کھول کر سن لے... اورنگزیب کی قبر بھی ہٹے گی اور کانگریس کا کفن بھی۔

ہندوستھان سماچار

---------------

ہندوستان سماچار / انظر حسن