لکھنؤ، 14 مارچ (ہ س)۔ یوپی اے ٹی ایس نے جمعہ کو آگرہ سے رویندر سنگھ نامی ایک شخص کو پاکستانی خفیہ ایجنسی آئی ایس آئی کے ایجنٹ کے ساتھ خفیہ معلومات شیئر کرنے کے الزام میں گرفتار کیا۔ وہ فیروز آباد آرڈیننس فیکٹری کا ملازم ہے۔ اے ٹی ایس نے اس کے موبائل فون سے کچھ مشتبہ معلومات حاصل کی ہیں۔ ایڈیشنل ڈائرکٹر جنرل آف پولیس (یوپی اے ٹی ایس) نیلبھجا چودھری نے جمعہ کو ایک پریس کانفرنس میں بتایا کہ رویندر سنگھ آگرہ کا رہنے والا ہے۔ ہنی ٹریپ کیس میں رویندر سنگھ نیہا نامی ہینڈلر سے بات کرتا تھا۔ رویندر 2009 سے آرڈیننس فیکٹری میں کام کر رہا تھا اور جون 2024 سے ہینڈلر کے ساتھ رابطے میں تھا۔ اس دوران، رویندر نے خفیہ معلومات، بشمول آرڈیننس اسٹور ڈیٹا، ہینڈلر کے ساتھ واٹس ایپ اور فیس بک کے ذریعے شیئر کیا۔ اے ڈی جی نے کہا کہ رویندر کی گرفتاری کے بعد ان سے سنجیدگی سے پوچھ گچھ کی جا رہی ہے۔ آئی ایس آئی کے ماڈیول طویل عرصے سے لوگوں کو پھنسا رہے ہیں اور ان سے قومی سلامتی سے متعلق معلومات حاصل کر رہے ہیں۔ جو ملک کے لیے بہت بڑا خطرہ ہے۔ رویندر سے پوچھ گچھ کے دوران اے ٹی ایس کو یہ بھی معلوم ہوا کہ وہ وقتاً فوقتاً مذکورہ ہینڈلر کے ساتھ معلومات شیئر کرتا تھا، جس میں روزانہ کی پروڈکشن کی رپورٹس اور آرڈیننس فیکٹری کی اسٹور کی رسیدیں، مجرمانہ عمل کے دیگر دستاویزات، آنے والا اسٹاک، اسٹاک کی مانگ وغیرہ شامل تھی۔

---------------

ہندوستان سماچار / عبدالسلام صدیقی