مہاراشٹر کے گڑھ چرولی کو اسٹیل اور کان کنی کے مرکز کے طور پر فروغ دینے کی تیاری

ممبئی، 14 مارچ (ہ س)۔ مہاراشٹر کے وزیر اعلیٰ دیویندر فڈنویس نے نئی

دہلی میں وزیر اعظم نریندر مودی سے ملاقات کی اور گڑھ چرولی کے ترقیاتی منصوبوں کے

مختلف پہلوؤں پر تبادلہ خیال کیا۔ ودربھ علاقے میں واقع گڑھ چرولی 14412 مربع

کلومیٹر پر پھیلا ہوا ہے اور اسے چھ سب ڈویژنوں میں تقسیم کیا گیا ہے، جن میں

گڑھ چرولی، چمورشی، اہیری، ایٹا پلی، دیسائی گنج اور کرکھیڑا شامل ہیں، جبکہ ہر سب

ڈویژن میں دو تعلقے ہیں۔ ضلع میں تین میونسپلٹی، نو نگر پنچایتیں، 457 گرام

پنچایتیں اور 1688 ریونیو گاؤں شامل ہیں۔

فڈنویس، جو ریاست کے وزیر داخلہ ہونے کے ساتھ ساتھ

گڈچرولی کے سرپرست وزیر بھی ہیں، ذاتی طور پر ضلع کی ترقی کی نگرانی کر رہے ہیں۔

انہوں نے کہا کہ وزیراعظم کے ساتھ اسٹیل کے شعبے میں ہونے والی پیش رفت پر تفصیلی

گفتگو ہوئی۔ خاص طور پر گڈچرولی کو اسٹیل سٹی کے طور پر فروغ دے کر

اسے ایک بڑے صنعتی مرکز میں تبدیل کرنے کے لیے اقدامات کیے جا رہے ہیں۔

گڈچرولی میں لوہے کی کانوں کی اہمیت کو دیکھتے

ہوئے، لوئیڈز میٹلز اینڈ انرجی لمیٹڈ (ایل ایم ای ایل) یہاں کے سرجاگڑھ پہاڑی

علاقے میں لوہے کی کان چلا رہی ہے۔ اس کے علاوہ، جے ایس ڈبلیو گروپ بھی گڈچرولی

میں ایک بڑے اسٹیل پلانٹ کے قیام کے لیے ایک لاکھ کروڑ روپے کی سرمایہ کاری کر رہا

ہے۔ فڈنویس نے وزیراعظم سے اپیل کی کہ گڈچرولی کو مزید ترقی دے کر ایک اہم کان کنی

مرکز کے طور پر قائم کرنے میں مرکز تعاون کرے۔

گڈچرولی میں معدنی وسائل کی وافر مقدار موجود ہے،

جن میں لوہا، چونا پتھر اور ہیرے شامل ہیں۔ لوہے کے ذخائر بنیادی طور پر سرجاگڑھ

اور بھامرا گڑھ علاقوں میں ہیں، جبکہ چونا پتھر دیوالمالی اور کٹے پلی میں پایا

جاتا ہے، اور ہیرے ویرا گڑھ علاقے میں موجود ہیں۔

فڈنویس نے نئے سال کا پہلا دن گڈچرولی میں گزارا

تھا، جہاں انہوں نے مختلف ترقیاتی منصوبوں کا افتتاح کیا، مقامی لوگوں اور بچوں سے

ملاقات کی، اور ضلع انتظامیہ و پولیس کے ساتھ جائزہ اجلاس منعقد کیے۔ انہوں نے کہا

کہ شمالی گڈچرولی مکمل طور پر نکسل ازم سے پاک ہو چکا ہے اور جنوبی گڈچرولی بھی

جلد ہی نکسل فری ہو جائے گا۔ گزشتہ چار سے پانچ سالوں میں ماؤنوازوں کی کوئی نئی

بھرتی نہیں ہوئی اور کئی نکسل کمانڈروں نے ہتھیار ڈال دیے ہیں، جس سے نکسل تحریک

کی کمر توڑ دی گئی ہے۔

وزیر اعظم نریندر مودی نے بھی گڈچرولی کے ترقیاتی

منصوبوں اور فڈنویس کی کاوشوں کی تعریف کی۔ انہوں نے کہا کہ مہاراشٹر حکومت کی یہ

کوششیں دور دراز اور ماؤنواز سے متاثرہ علاقوں میں ہمہ جہت ترقی کو یقینی بنائیں

گی، جس سے لوگوں کی زندگی میں آسانی پیدا ہوگی اور مزید ترقی کی راہ ہموار ہوگی۔

ہندوستھان

سماچار

--------------------

ہندوستان سماچار / نثار احمد خان