ممبئی، 12 مارچ (ہ س)۔

ممبئی پولیس آج ایس پی لیڈر ابو عاصم اعظمی سے اورنگ زیب کی حمایت میں بیان کے سلسلے میں میرین لائنز پولیس اسٹیشن میں پوچھ گچھ کر رہی ہے۔ اس معاملے میں ممبئی کی سیشن کورٹ نے 20,000 روپے کے ذاتی مچلکے پر ابو اعظمی کو پیشگی ضمانت دی ہے۔ ممبئی پولیس کی ٹیم 13 اور 15 مارچ کو بھی ابو اعظمی سے بھی پوچھ گچھ کرے گی۔ مہاراشٹر اسمبلی نے ابو اعظمی کو بجٹ اجلاس کی مدت کے لیے معطل کر دیا ہے۔

پولیس ذرائع کے مطابق ایس پی لیڈر ابو عاصم اعظمی بدھ کی صبح تقریباً 11 بجے میرین لائنز پولیس اسٹیشن میں پیش ہوئے۔ پولیس نے اورنگ زیب کی تعریف کرنے کے معاملے میں ان سے پوچھ گچھ شروع کر دی ہے۔ ابو عاصم کو ممبئی کی سیشن کورٹ نے پیشگی ضمانت دے دی ہے، اس لیے انہیںگرفتار نہیں کیا جائے گا۔ اس معاملے میں ابو اعظمی سے بھی 13 اور 15 مارچ کو پوچھ گچھ کی جائے گی اور اس کے بعد پولیس تفتیشی رپورٹ سیشن کورٹ میں پیش کرے گی۔

قابل ذکر ہے کہ ابو عاصم اعظمی نے ایک بیان دیتے ہوئے کہا تھا کہ اورنگ زیب ایک اچھے ایڈمنسٹریٹر تھے۔ اس بیان کے بعد حکمراں پارٹی کے ایم ایل اے جارحانہ ہوگئے اور اسمبلی میں ان کی معطلی اور گرفتاری کا مطالبہ کیا۔ اس کے بعد اسمبلی اسپیکر راہل نارویکر نے اعظمی کو بجٹ اجلاس تک اسمبلی سے معطل کر دیا۔ ساتھ ہی وزیر اعلی دیویندر فڑنویس نے اعظمی کے خلاف کارروائی کا حکم جاری کیا تھا۔

اس کے بعد ابو عاصم اعظمی کے خلاف میرین لائنز پولیس اسٹیشن میں مقدمہ درج کیا گیا تھا۔ جس کے بعد ابو عاصم کی گرفتاری کا امکان بڑھ گیا تھا۔ اس دوران اعظمی نے ممبئی سیشن کورٹ میں پیشگی ضمانت کی درخواست دی تھی۔ عدالت نے یہ درخواست منظور کرتے ہوئے بیس ہزار روپے کے مچلکوں پر ضمانت منظور کر لی۔ عدالت نے انہیں 12، 13 اور 15 مارچ کو تفتیشی افسران کے سامنے پیش ہونے کی بھی ہدایت کی۔ اس تنازع کے بعد ابو عاصم اعظمی نے اپنا بیان واپس لے لیا تھا اور کہا تھا کہ ہم دونوں چھتر پتیوں کی کبھی توہین نہیں کر سکتے، لیکن ہمارے بیان کو توڑ مروڑ کر پیش کیا گیا ہے۔ اعظمی نے کہا کہ اس معاملے کو سیاسی موڑ دیا جا رہا ہے۔

ہندوستھان سماچار

ہندوستان سماچار / عطاءاللہ