نئی دہلی، 12 مارچ (ہ س)۔ دہلی ہائی کورٹ نے یوٹیوبر شیام میرا سنگھ پر سدھ گرو جگی واسودیو کی ایشا فاؤنڈیشن کے خلاف مبینہ طور پر ہتک آمیز ویڈیوز بنانے اور سوشل میڈیا پر پوسٹ کرنے پر پابندی لگا دی ہے۔ جسٹس سبرامنیم پرساد نے شیام میرا سنگھ کو ایشا فاؤنڈیشن کے خلاف پوسٹ کیے گئے ٹویٹس اور ویڈیوز کو حذف کرنے کی بھی ہدایت دی۔ کیس کی اگلی سماعت 9 مئی کو ہوگی۔

عدالت نے کہا کہ یہ ویڈیوز پہلی نظر میں ہتک آمیز ہیں اور کسی کی تصویر اس کے وقار کا لازمی حصہ ہے۔ عدالت نے کہا کہ آزادی اظہار اور تصویر کے درمیان توازن برقرار رکھا جائے۔ عدالت نے گوگل اور میٹا پلیٹ فارم کو ہدایت دی کہ شیام میرا سنگھ کی جانب سے ایشا فاؤنڈیشن پر اپ لوڈ کی گئی ویڈیو کو فوری طور پر ہٹا دیا جائے۔ عدالت نے شیام میرا سنگھ اور ان کے ملازمین اور ان سے وابستہ لوگوں کو ہدایت دی کہ وہ یہ ویڈیو کسی بھی پلیٹ فارم پر اپ لوڈ نہ کریں۔ عدالت نے عام لوگوں کو یہ بھی ہدایت کی کہ وہ اس ویڈیو کو کسی بھی پلیٹ فارم پر شیئر نہ کریں۔

ایشا فاؤنڈیشن کی درخواست میں کہا گیا ہے کہ یوٹیوبر اور صحافی شیام میرا سنگھ نے 24 فروری کو یوٹیوب پر ایک ویڈیو اپ لوڈ کی تھی۔ اس ویڈیو کا ٹائٹل تھا سدھ گرو ایکسپوزڈ: جگی واسودیو کے آشرم میں کیا ہو رہا ہے۔ اس ویڈیو میں کہا گیا تھا کہ ایشا فاؤنڈیشن کے آشرم میں نابالغ لڑکیوں کا جنسی استحصال کیا جاتا ہے۔ درخواست میں کہا گیا ہے کہ شیام میرا سنگھ نے حقائق کی تصدیق کیے بغیر اپنا ویڈیو اپ لوڈ کیا جو کہ ہتک آمیز ہے۔

---------------

ہندوستان سماچار / عبدالسلام صدیقی