نئی دہلی، 11 مارچ (ہ س)۔ شاہدرہ ضلع کے آنند وہار علاقے میں کل دیر رات ایک عارضی خیمے میں آگ لگ گئی۔ حادثے میں تین مزدور جھلس کر جاں بحق ہو گئے جبکہ ایک مزدور کو معمولی چوٹیں آئیں۔ یہ واقعہ کل رات 2.22 بجے پیش آیا۔ آگ لگنے سے ایک چھوٹا گیس سلنڈر پھٹ گیا۔ واقعہ کی اطلاع ملتے ہی آنند وہار پولیس اسٹیشن اور فائر بریگیڈ کی دو گاڑیاں موقع پر پہنچ گئیں۔ فائر فائٹرز نے آدھے گھنٹے میں آگ پر قابو پالیا۔ آگ بجھانے کے بعد سرچ آپریشن کے دوران ایک عارضی خیمے سے تین جلی ہوئی لاشیں نکال لی گئیں۔ پولیس نے لاش کو اپنی تحویل میں لے کر پوسٹ مارٹم کے لیے قریبی اسپتال کے مردہ خانہ میں محفوظ کردیا۔ کرائم ٹیم نے جائے وقوعہ کا معائنہ کر کے شواہد اکٹھے کر لیے ہیں۔

فائر ڈپارٹمنٹ کے مطابق آنند وہار کڑکڑڈوما کورٹ میں واقع اے جی سی آر انکلیو کے قریب ایک عارضی خیمے میں آگ لگنے کی اطلاع ملی۔ اطلاع ملتے ہی فائر بریگیڈ کی دو گاڑیاں موقع پر روانہ کی گئیں۔ فائر فائٹرز نے 2 بج کر 50 منٹ پر آگ پر قابو پالیا۔

شاہدرہ ضلع کے ڈی سی پی پرشانت گوتم کے مطابق، مرنے والوں کی شناخت جگی (30) اور اس کے بھائیوں شیام سنگھ (40) اور کانتا پرساد عرف جتیندر (37) کے طور پر کی گئی ہے۔ یہ سبھی یوپی کے اوریا کے رہنے والے تھے اور یہاں مزدوری کرتے تھے۔ پولیس نے بتایا کہ متوفی اور ایک اور مزدور اندرا پرستھا گیس لمیٹڈ (آئی جی ایل) میں کام کرتے تھے اور منگلم روڈ پر ڈی ڈی اے پلاٹ کے قریب واقع ایک عارضی خیمے میں رہتے تھے۔

دوران تفتیش معلوم ہوا کہ جاں بحق افراد آئی جی ایل کمپنی کے عارضی ملازم تھے۔ وہ رات کو خیمے کو بند کر کے اندر روشنی کے لیے ڈیزل کا ڈبہ جلاتا تھا۔ حادثے میں زخمی نتن سنگھ نے بتایا کہ کل رات 2 بجے شیام سنگھ نے خیمے میں آگ دیکھی اور اسے جاگنے کو کہا۔ شیام سنگھ نے خیمے سے فرار ہونے کے لیے تالا کھولنے کی کوشش کی لیکن کامیاب نہ ہو سکا۔ نتن سنگھ خیمے سے فرار ہونے میں کامیاب ہو گئے جبکہ دیگر آگ میں پھنس گئے۔ جگی، شیام سنگھ اور کانتا جل کر مر گئے۔ نتن کے مطابق آگ میں گیس سلنڈر پھٹ گیا ہے۔ آنند وہار پولیس اسٹیشن نے لاپرواہی کی وجہ سے موت کا معاملہ درج کیا ہے۔ فی الحال پولس پورے معاملے کی جانچ کر رہی ہے۔

---------------

ہندوستان سماچار / عبدالسلام صدیقی