دمشق،10مارچ(ہ س)۔

شام کے دار الحکومت دمشق میں آج پیر کے روز سکیورٹی دستے کو دوران گشت بم حملے کا نشانہ بنایا گیا۔ یہ واقعہ صدر احمد الشرع کے اس عزم کے اعلان کے چند گھنٹے بعد پیش آیا جس میں ان کا کہنا تھا کہ شہریوں کے خون میں ملوث ہر فرد کا احتساب کیا جائے گا۔ ان کا اشارہ ملک کے مغربی ساحل کے واقعات کی جانب تھا۔العربیہ کے نمائندے کے مطابق سکیورٹی دستے کو دمشق کے علاقے المزہ میں نشانہ بنایا گیا۔ واقعے کے بعد سکیورٹی فورسز سابق نظام کی باقیات کے ایک گروپ کا تعاقب کر رہی ہیں۔

ادھر شامی وزارت داخلہ نے مغربی ساحل کے حصے میں دو صوبوں لاذقیہ اور طرطوس کے لیے فوجی کمک ارسال کر دی۔ اس کا مقصد گذشتہ دنوں کے دوران میں سکیورٹی فورسز اور سابق نظام کے حامی مسلح عناصر کے درمیان شدید جھڑپوں کے بعد امن و امان کی صورت حال پر قابو پانا ہے۔یہ واقعات آٹھ دسمبر کو بشار الاسد کی حکومت کے سقوط کے بعد ملک میں دیکھی جانے والی سب سے پر تشدد کارروائیاں ہیں۔

ہندوستھان سماچار

ہندوستان سماچار / Md Owais Owais