نئی دہلی، 31 دسمبر (ہ س)۔

دہلی کے ماحولیات اور جنگلات کے وزیر منجندر سنگھ سرسا نے آج اولا، اوبر، ریپیڈو سمیت ٹیکسی اور نقل و حرکت کے بڑے اداروں اور محکمہ ٹرانسپورٹ کے سینئر افسران کے ساتھ دہلی سکریٹریٹ میں میٹنگ کی۔

وزیر سرسا نے کہا کہ دہلی حکومت عوام کے لیے صاف ہوا کو یقینی بنانے کے لیے چار اہم شعبوں: گاڑیوں کی آلودگی، صنعتی آلودگی، دھول کی آلودگی اور فضلہ کے انتظام پر باہمی تعاون کے ساتھ کام کر رہی ہے۔ انہوں نے کہا کہ موبلٹی ایگریگیٹرز ٹریفک کو کم کرنے اور مشترکہ اور سبز نقل و حمل کو فروغ دینے میں اہم کردار ادا کرتے ہیں۔ اجلاس میں محکمہ ٹرانسپورٹ کے اعلیٰ افسران نے شرکت کی۔ وزیر سرسا نے وزیر ٹرانسپورٹ ڈاکٹر پنکج کمار سنگھ کی دہلی میں الیکٹرک بسوں کی تعداد بڑھانے اور ای وی کو فروغ دینے کی ان کی کوششوں کی بھی ستائش کی۔ اجلاس میں رائیڈ شیئرنگ پر تفصیلی تبادلہ خیال کیا گیا۔ وزیر نے اس بات پر زور دیا کہ تمام ایگریگیٹرس کو چاہئے کہ وہ جلد از جلد دہلی میں رائیڈ شیئرنگ خدمات دوبارہ شروع کریں، کیونکہ اس سے سڑکوں پر گاڑیوں کی تعداد کم ہوتی ہے اور آلودگی کم ہوتی ہے۔ ایگریگیٹرس نے اطلاع دی کہ کچھ تکنیکی اور آپریشنل تیاریاں باقی ہیں، جس کے بعد وزیر نے محکمہ ٹرانسپورٹ کو ہدایت کی کہ وہ ایک ماہ کے اندر رائیڈ شیئرنگ سروس کو مکمل طور پر نافذ کرے۔

اس کے بعد کار پولنگ کے معاملے پر بات ہوئی۔ وزیر نے کہا کہ کار پولنگ، خاص طور پر دفتری اوقات کے دوران، ٹریفک اور آلودگی دونوں کو نمایاں طور پر کم کر سکتی ہے۔ میٹنگ میں کارپولنگ کو غیر تجارتی، مشترکہ سفری آپشن کے طور پر بھی زیر بحث لایا گیا۔ ایگریگیٹرس نے مشورہ دیا گیا کہ وہ اپنی ایپس میں کارپولنگ کی خصوصیت تیار کریں یا علیحدہ کارپولنگ پلیٹ فارم پر کام کریں۔ محکمہ ٹرانسپورٹ سے کہا گیا کہ وہ کارپولنگ سے متعلق ضوابط کا جائزہ لے اور اسے جلد فروغ دینے کے لیے ضروری سفارشات فراہم کرے۔

برقی نقل و حرکت کو فروغ دینے کے لیے، وزیر نے کہا کہ نجی طور پر رجسٹرڈ الیکٹرک گاڑیوں کو تجارتی فیس، اجازت نامے، یا اضافی لائسنسنگ کی ضروریات کے بغیر ایگریگیٹر پلیٹ فارم کے ساتھ مربوط کیا جا سکتا ہے۔ محکمہ ٹرانسپورٹ کو قانونی، حفاظت اور انشورنس کے پہلوو¿ں کا جائزہ لینے اور ایک ایسا فریم ورک تیار کرنے کی ہدایت کی گئی جو نجی ای وی مالکان کو محفوظ طریقے سے حصہ لینے کی اجازت دے گی۔

وزیر نے ایگریگیٹرس پر بھی زور دیا کہ وہ بس اور شٹل خدمات کو بڑھا دیں، خاص طور پر دفتری راستوں اور زیادہ مانگ والے علاقوں میں۔

ہندوستھان سماچار

ہندوستان سماچار / عطاءاللہ