دھنباد، 27 دسمبر (ہ س)۔ راج گنج تھانہ علاقہ کے تحت چھ لین والی سڑک پر کل دیر رات ایک سڑک حادثہ پیش آیا۔ تیز رفتار ٹرک سے کار کی ٹکر سے دو افراد موقع پر ہی جاں بحق اور ایک خاتون شدید زخمی ہوگئی۔

موصولہ اطلاع کے مطابق کار ایک خاتون کو سریا بازار سے علاج کے لیے دھنباد لے جا رہی تھی۔ کار میں تین خواتین سمیت پانچ افراد سوار تھے۔ آگے بڑھنے والے ٹرک کے ڈرائیور نے اچانک بریک لگائی تو کار ڈرائیور کنٹرول کھو بیٹھا اور ٹرک سے سیدھا ٹکرا گیا۔ ٹکر اتنی شدید تھی کہ کار کا اگلا حصہ مکمل طور پر تباہ ہو گیا۔

کار میں موجود معمر خاتون کی موقع پر ہی موت ہو گئی جبکہ اس کے ساتھ موجود ایک رشتہ دار دوران علاج دم توڑ گیا۔ زخمی خاتون کو 108 ایمبولینس کے ذریعے دھنباد کے ایس این ایم ایم سی ایچ منتقل کیا گیا، جہاں اس کی حالت نازک بنی ہوئی ہے۔

واقعہ کی اطلاع ملتے ہی راج گنج پولیس جائے وقوعہ پر پہنچی اور امدادی کارروائیاں شروع کر دیں۔ پولیس نے لاشوں کو پوسٹ مارٹم کے لیے بھجوا دیا ہے اور ٹرک کو قبضے میں لے کر مزید تفتیش کی تیاری کر رہی ہے۔

علاقہ مکینوں کا کہنا ہے کہ جائے وقوعہ پر موجود سٹریٹ لائٹس اکثر بند رہتی ہیں جس سے رات کے وقت حادثات کا خطرہ بڑھ جاتا ہے۔ انہوں نے انتظامیہ سے فوری طور پر روڈ سیفٹی اور لائٹنگ کو بہتر کرنے کا مطالبہ کیا ہے۔

ہندوستھان سماچار

---------------

ہندوستان سماچار / عبدالواحد