لداخ , 27 دسمبر (ہ س)۔ مرکز کے زیر انتظام علاقے لداخ میں گزشتہ چوبیس گھنٹوں کے دوران موسم بنیادی طور پر خشک رہا ۔وہیں محکمہ موسمیات نے لداخ خطے کے لیے موسمی پیش گوئی جاری کرتے ہوئے بتایا ہے کہ دسمبر کے آخری ایام میں رات کے درجۂ حرارت میں نمایاں کمی آئے گی جبکہ بلند علاقوں میں برفباری کا امکان ہے۔محکمہ کے مطابق 28 دسمبر کو موسم زیادہ تر ابر آلود رہنے کی توقع ہے، جبکہ 29 دسمبر کو جزوی طور پر ابر آلود موسم رہ سکتا ہے۔ 30 دسمبر کو دن بھر مطلع ابر آلود رہنے کا امکان ظاہر کیا گیا ہے۔

محکمہ موسمیات کا کہنا ہے کہ 30 دسمبر اور 31 دسمبر کی درمیانی شب زوجیلا پاس–دراس محور اور سیاچن گلیشیئر کے بعض حصوں میں ہلکی برفباری کا 55 سے 60 فیصد امکان ہے۔مزید بتایا گیا ہے کہ 31 دسمبر اور یکم جنوری کے دوران موسمی نظام میں شدت آ سکتی ہے، جس کے نتیجے میں سرد اور ابر آلود موسم برقرار رہے گا۔ اس دوران زوجیلا، کرگل اور زنسکار کے مختلف مقامات کے علاوہ ضلع لیہہ کے بالائی علاقوں میں ہلکی سے درمیانی درجے کی برفباری متوقع ہے۔

محکمہ موسمیات کے حکام کے مطابق بعض علاقوں، بالخصوص زوجیلا–مینا مرگ محور پر بھاری برفباری کے باعث برف کی تہہ 10 انچ تک جمع ہو سکتی ہے۔

اگرچہ فی الحال کوئی باضابطہ وارننگ جاری نہیں کی گئی، تاہم حکام نے خبردار کیا ہے کہ 31 دسمبر اور یکم جنوری کے دوران برفباری کے سبب زوجیلا راستے پر ٹریفک عارضی طور پر متاثر ہو سکتی ہے۔

حکام نے مسافروں، ٹرانسپورٹروں اور مقامی لوگوں کو مشورہ دیا ہے کہ وہ تازہ موسمی اطلاعات پر نظر رکھیں اور سفر سے قبل مناسب منصوبہ بندی کریں۔

ہندوستھان سماچار

---------------

ہندوستان سماچار / محمد اصغر