حیدرآباد میں فلڈ موک ڈرل، آفات سے نمٹنے کی مشقحیدرآباد , 23 دسمبر(ہ س)۔ حیدرآباد میں سیلابی صورتحال سے نمٹنے کی تیاریوں کو مزید مضبوط بنانے کے لیے نیکلس روڈ (ویو پوائنٹ علاقہ) میں ایک جامع فلڈ موک ڈرل کامیابی کے ساتھ منعقد کی گئی۔ یہ مشق حیدرآباد ضلع انتظامیہ نے نیشنل ڈیزاسٹر مینجمنٹ اتھارٹی (این ڈی ایم اے) کے اشتراک سے انجام دی، جس کا مقصد ہنگامی حالات میں فوری ردِعمل اور مختلف محکموں کے درمیان بہتر تال میل کا جائزہ لینا تھا۔ یہ فلڈ موک ایکسرسائزانسیڈنٹ رسپانس سسٹم (آئی آر ایس) کے تحت منعقد کی گئی، جس میں ضلع ریونیو افسر وینکٹاچاری نے انسیڈنٹ کمانڈر کے طور پر ذمہ داریاں نبھائیں، جبکہ ڈپٹی کلکٹر روی نے اسٹیجنگ ایریا مینیجر کے فرائض انجام دیے۔ مشق کے دوران میدانِ عمل میں وسائل کی منظم تعیناتی، ریسکیو آپریشنز اور ایمرجنسی مینجمنٹ کے تمام پہلوؤں کا عملی مظاہرہ کیا گیا۔ اس موک ڈرل میں ریونیو، پولیس، فائرسروسز، میڈیکل اینڈ ہیلتھ، جی ایچ ایم سی، ٹرانسپورٹ، آبپاشی، بجلی، پانی کی فراہمی، سول سپلائیز، اینیمل ہسبنڈری، یوتھ سروسز، حیڈرا اے، ایس ڈی آر ایف، این ڈی آر ایف، آر اینڈ بی اور دیگر متعلقہ محکموں نے بھرپور شرکت کی۔ تمام محکموں کے درمیان بہتر ہم آہنگی اور فوری ردِعمل نے شہری علاقوں میں سیلابی صورتحال سے نمٹنے کی صلاحیت کو اجاگر کیا۔ این ڈی ایم اے کے اسٹیٹ آبزرور (بریگیڈیئر) اور فائر سروسز کے ڈائریکٹر جنرل وکرم سنگھ مان نے مشق کا معائنہ کیا اورموقع پرموجود افسران سے تبادلہ خیال کیا۔ انہوں نے نشیبی شہری علاقوں میں سیلاب سے بچاؤ کی حکمتِ عملی، کمانڈ اینڈ کنٹرول سسٹم، ڈیزاسٹرمینجمنٹ ایکٹ کے تحت ذمہ داریوں اور آئی آر ایس کے مختلف عہدوں کی عملی افادیت پر گفتگو کی اور قیمتی مشورے دیے۔ این ڈی ایم اے کے لیڈ کنسلٹنٹ سدھیربھال (ریٹائرڈ) نے مختلف محکموں کے درمیان شاندار تعاون اور نظم و ضبط کے ساتھ انجام دی گئی اس مشق کی ستائش کی۔ ان کا کہنا تھا کہ اس طرح کی موک ڈرلز حقیقی ہنگامی حالات میں بروقت اور مؤثر ردِعمل کے لیے نہایت اہم ہوتی ہیں۔ موک ڈرل کے بعد این ڈی ایم اے کی ٹیم اور فائر سروسز کے ڈائریکٹر جنرل نے کمس (کے آئی ایم ایس) ہاسپٹل کا دورہ بھی کیا، جہاں ہاسپٹل کی ڈیزاسٹر تیاریوں کاجائزہ لیا گیا۔ اس موقع پر ایمرجنسی رسپانس پروٹوکول، مریضوں کی تعداد میں اچانک اضافے سے نمٹنے کی صلاحیت، ٹرائیج سسٹم اور طبی محکموں کے درمیان تال میل کا معائنہ کیا گیا اورہاسپٹل سطح پر آفات سے نمٹنے کے نظام کو مزید مضبوط بنانے کے لیے اہم تجاویز پیش کی گئیں۔یہ فلڈ موک ایکسرسائز اس بات کی عکاس ہے کہ حیدرآباد انتظامیہ اور متعلقہ ادارے آفات سے نمٹنے کے لیے سنجیدہ ہیں اور شہر کو کسی بھی ہنگامی صورتحال کے لیے بہتر طور پر تیار رکھنے کے لیے مسلسل اقدامات کر رہے ہیں۔
ہندوستھان سماچار
ہندوستان سماچار / محمدعبدالخالق
23 Dec 2025
