نئی دہلی، 7 نومبر (ہ س)۔ دہلی کی سڑکوں کو محفوظ اور شفاف بنانے کے اپنے مشن کے تحت دہلی ٹریفک پولیس نے گاڑیوں پر رنگین یا سیاہ شیشوں کے استعمال کے خلاف ایک خصوصی مہم شروع کی ہے۔ اس مہم کا مقصد روڈ سیفٹی کو فروغ دینا اور موٹر وہیکل ایکٹ کی سختی سے تعمیل کو یقینی بنانا ہے۔

ایڈیشنل ٹریفک کمشنر ستیہ ویر کٹارا نے بتایا کہ ٹریفک پولیس نے یکم نومبر سے 6 نومبر تک ایک ہفتہ تک چلنے والی خصوصی مہم کے دوران 2,235 گاڑیوں کے چالان کاٹے ہیں، جو ٹنٹیڈ شیشے استعمال کرتی پائی گئیں۔ اس مہم کا مقصد نہ صرف چالان جاری کرنا ہے بلکہ لوگوں کو سڑک کی حفاظت کے لیے ضرورت سے زیادہ سیاہ شیشوں کے خطرات سے آگاہ کرنا بھی ہے۔ ایڈیشنل پولیس کمشنر نے وضاحت کی کہ حد سے زیادہ سیاہ شیشے نہ صرف ڈرائیور کی بصارت کو متاثر کرتے ہیں بلکہ مجرموں کو چھپنے کا موقع بھی فراہم کرتے ہیں۔ ایسی گاڑیاں امن و امان کے لیے ایک چیلنج بن جاتی ہیں کیونکہ پولیس کے لیے اندر موجود لوگوں کی سرگرمیوں پر نظر رکھنا مشکل ہو جاتا ہے۔

قابل ذکر ہے کہ دہلی ٹریفک پولیس نے گزشتہ ایک سال میں ٹنٹڈ کھڑکیوں کے لیے تقریباً 20,232 چالان جاری کیے ہیں۔ یہ مہم پولیس کی سخت پالیسی اور عوام کی حفاظت کے عزم کی عکاسی کرتی ہے۔ ایڈیشنل کمشنر آف پولیس نے کہا کہ اس طرح کی مہمات نہ صرف ٹریفک قوانین کو نافذ کرنے کے لیے ضروری ہیں بلکہ شہریوں میں ٹریفک نظم و ضبط اور ذمہ دارانہ ڈرائیونگ کی عادتیں پیدا کرنے میں بھی مدد کرتی ہیں۔

ہندوستھان سماچار

ہندوستان سماچار / محمد شہزاد