نئی دہلی، 6 نومبر (ہ س)۔ دہلی ہائی کورٹ نے دہلی پولیس کو ہدایت دی کہ وہ دہلی یونیورسٹی اسٹوڈنٹس یونین (ڈی یو ایس یو) کے سابق صدر اور این ایس یو آئی لیڈر رونک کھتری کی سیکورٹی مانگنے والی عرضی پر جلد فیصلہ کرے۔ جسٹس رویندرا ڈوڈیجا نے دہلی پولیس کو ہدایت دی کہ ایک بیٹ کانسٹیبل اگلے دو ہفتوں تک روزانہ ایک بار رونک کھتری کے گھر جائے گا تاکہ ان کی حفاظت کو یقینی بنایا جاسکے۔

روونک کھتری نے روہت گودارا گینگ کی طرف سے جبری وصولی کے مطالبات کے بعد دہلی پولیس سے تحفظ کی درخواست دائر کی تھی۔ سماعت کے دوران وکلاءاوبھیروپ گھوش اور نشانت کھتری نے رونک کھتری کی نمائندگی کرتے ہوئے بتایا کہ 29 ستمبر کو انہیں یوکرین میں رجسٹرڈ فون نمبر سے ایک پیغام موصول ہوا، جس میں خود کو روہت گودارا کہنے والے شخص نے 5 کروڑ روپے کا مطالبہ کیا۔ پیغام میں دھمکی دی گئی تھی کہ اگر اس نے رقم ادا نہیں کی تو درخواست گزار کو گولی مار دی جائے گی۔

سماعت کے دوران دہلی پولیس کے وکیل سنجے لا نے کہا کہ کھتری کی سیکورٹی کی درخواست اسپیشل سیل کے ڈی سی پی کو بھیج دی گئی ہے۔ ڈی سی پی خطرے کا جائزہ لیں گے اور فیصلہ کریں گے ۔

سماعت کے دوران عدالت نے کہا کہ تمام شہریوں کے تحفظ کی ذمہ داری حکومت کی ہے۔ آئینی عدالت کی حیثیت سے ہر شہری کے تحفظ کو یقینی بنانا اس کی ذمہ داری ہے۔ عدالت نے کہا کہ رونک کھتری کی جان کو خطرہ ہے، اس لیے شمالی اور بیرونی دہلی کے ڈی سی پی اور اسپیشل سیل کے ڈی سی پی کو درخواست گزار کی درخواست پر جلد فیصلہ کرنا چاہیے۔ دریں اثنا، ایک بیٹ کانسٹیبل اور ایس ایچ او رونک کھتری کی حفاظت کو یقینی بنائیں گے۔ بیٹ کانسٹیبل روزانہ ایک بار کھتری سے ملاقات کرکے ان کی خیریت دریافت کرے گا۔

ہندوستھان سماچار

ہندوستان سماچار / محمد شہزاد